Julor 10 hajar tylli ki dieng ba shongdor T.4.7 lak, shah bat 3 ngut

Ha kane ka jingjia kumba 10 hajar tylli ki tynrai dieng kiba shongdor haduh T4.7 lak ki la julor lut.

Shillong, Rymphang 04

Lai ngut ki la shah bat bad shah aiti noh sha ki pulit halor ka jingkynnoh ba ki donkti ban thang ïa ka khlaw jong ka tnat Forest kaba la wanrah ka jingjulor kaba jur ba la kot da ki lak tyngka.

Katkum ka khubor na ki pulit la ong ba u Range Forest Officer, Social Forestry, Range Pynursla ha East Khasi Hills u la ai ka jingujor ba ha ka step jong ka 2 tarik mynta u bnai, ka la don ka jingpluh ding ha ka jaka thung dieng ba la leh da ka tnat Khlaw (Forest Department) kaba don ha Mawrympheit Umïew, Maw-U-Sam, Smit ha East Khasi Hills.

Ha kane ka jingjia kumba 10 hajar tylli ki tynrai dieng kiba shongdor haduh T4.7 lak ki la julor lut.

Haba la pynlong ïa ka jingtohkit halor kane ka jingjia, la lap ba ki don lai ngut ki briew ba kynthup ïa u Shandrasing Khongsngi (52 snem), u Skhemboklang Rynjah (30 snem) bad u Shabistar Kharkongor (40 snem) ba ki la donkti ban thang ding hapoh katei ka khlaw. Ïa kine lai ngut la ïoh ban bat bad la aiti noh sha ki pulit ban leh ïa kaba donkam.

Ha kawei pat ka khubor, u Bah Zandy Myrthong u la ai da ka jingujor ba ha ka 25 tarik jong u Kyllalyngkot, 2025, ki runar bym lah ban ithuh ki la thang ïa ka khlaw kaba don ha Lum Niangram ha shnong Pyndenumjarain kaba hap ha South West Khasi Hills.

Ha kane ka jingjia kumba 7 hajar tylli ki tynrai dieng kiba shongdor kumba T.4 lak ki la julor lut.