Shillong, Rymphang 04
U kyrtong MDC ka Congress na Mawlai konstitwensi, Bah Wanseng Jyrwa ha ka Lah Sngi U Blei u la kular ban plie ïa ki lad ki lynti na bynta ki khun samla ka thaiñ ha ki liang bapher-bapher lada u poi sha ka thong ha kane ka kynti.
Haba ai jingkren ha ka jingïalang kaba la long ha Stand Bus, Mawlai, u Bah Jyrwa u la ong ba ki don bun bah ki khun samla kiba la nang la stad bad kiba don ïa ki sap ki phong ban trei ïa ki kam bapher-bapher.
“Ngan btin bad prat lynti na bynta jong ki bad kiei ki kam kiba ki khun jong ngi ki la lah ban trei, ngin ai lad ïa ki ba kin sdang ïa kita ki kam, la ka long ha ka khaïi-pateng ne kino-kino ki bynta jong ki kam kiba ngi, ngi lah ban leh bad btin lynti ïa ki khnang ba ki lah ban ïeng ha la ki jong ki kjat,” ong u Bah Jyrwa.
Haba khot ba wer ïa ka jingïatreilang jong ki nongshong shnong, u la ong ba kane ka jingïakhun ilekshon kam dei ka jingïakhun jong u hynrei ka dei ka jingïakhun jong u paidbah nongshong shnong ka Mawlai ban wanrah jingkylla ha ka shnong Mawlai bad ïa ka lawei ba phyrnai na bynta ki khun ki kti.
“Ngin pyntikna ba ngin ym ai shuh ki ‘Trading License’ sha ki bar-jylla lada ki khun jong ngi ki la lah ban leh ïa kita ki kam khnang ban kiew ka ïoh ka kot jong ka ri jong ngi,” u la ong.
Haba kdew ba ka KHADC ka dei kata ka Ïingdorbar Thawaiñ ka ban shna ïa ki aiñ ki ban ïada kyrpang ïa u Khasi-Khara, une u kyrtong u la ong ba ka ktien ‘Autonomous’ ka mut ka jingpynkup bor ïa u paidbah Khasi-Khara khnang ba u lah ban synshar hi dalade ïalade.
“Dei na kane ka daw ba nga sa kwah ban ïakhun ïa kane ka ilekshon khnang ba ngan lah ban leit hangtei bad ban nang pynkhlaiñ shuh-shuh ïa ki aiñ kiba la don ha KHADC, ki riti-dustur, ki aiñ na bynta ki kam khaïi-pateng kiba ïadei bad kane ka Jylla jong ngi,” u la ong.
U la bynrap, “Ngi donkam ba ka spah kaba u Blei u la kyrkhu kyrpang ïa ka ri jong ngi ba kan neh ha kane ka ri (jong ngi), ym ba kita kiwei ki jaidbynriew kin wan ban trei ïa ki kam ban lute ïa ka spah na kane ka ri jong ngi bad ban rah pat ïa ka jingïohnong sha ki Jylla jong ki.”
Kumjuh, haba batai shaphang ka seng kaba u mihkhmat, u Bah Jyrwa u la ong ba ka Congress ka dei ka seng kaba la don naduh shuwa ban ïoh ïa ka jinglaitluid na ka jingsynshar ki dohlieh bad ka la leh bha shibun ïa ka Jylla da kaba ai ruh ïa ka District Council.
Shuh shuh u la bynrap, “Ka District Council ngi ïoh lyngba ka jingpynkup bor ïa ngi ki Khasi lyngba ka khyrnit ba hynriew kaba la sot bad kaba dei ka dur jong ka Riti Synshar ka Ri. Kine kiei-kiei baroh ki dei ki jingtrei shitom jong ki mynbarim jong ngi kiba don ha ka Congress kaba ngi lah ban ïoh ïa ka District Council kaba lah ban ïada kyrpang ïa ka jinglong trai jong ngi, ïa ki hok bad ki riti-dustur jong ngi.”
