Pynrem jur ka SPC bad MEPA ba kheiñ ‘mynder’ ïa u nongthoh khubor

Ka Shillong Press Club (SPC) bad ka Meghalaya Editors' & Publishers Association (MEPA) ha ka jingïalang kaba la long ha Shillong Press Club ha ka Sngi Ba-ar ki la pynrem jur halor kawei ka jingthoh...

Shillong, Rymphang 04

Ka Shillong Press Club (SPC) bad ka Meghalaya Editors’ & Publishers Association (MEPA) ha ka jingïalang kaba la long ha Shillong Press Club ha ka Sngi Ba-ar ki la pynrem jur halor kawei ka jingthoh ha ka rynsan lad pathai (social media post) jong ka VPP Youth Wing kaba la khot pynlong ïa ka jingïaid ‘Rally’ ar-shaka ha ka 6 tarik u Rymphang, ban pyrshah ïa uwei na ki nongsoi jong ka shithi dawa panmap na u President ka VPP, Bah Ardent Basaïawmoit halor ka jingkynnoh ba khlem nongrim pyrshah ïa ar tylli ki lad pathai khubor – ka ‘Batesi TV’ bad ‘T7’ bad ka jingkynnoh ba ki pynsaphriang ïa ki khubor lamler.

U nongsoi na ka bynta ka MEPA, uba dei ruh u Vice-President jong ka seng, u dei u dkhot ba la slem bha jong ka seng ki nongthoh khubor hangne bad u la trei ha Meghalaya la palat laiphew snem. Ha kano-kano ka khep ym lah ban ai kyrteng ïa u kum u “mynder” (foreigner).

“Halor baroh, ki lad pathai khubor ha Meghalaya ki long kiba ïatylli bad kim ju bud ïa kano-kano ka rukom jong ka jingïapher jaidbynriew hynrei ki la long kum ka kynhun kaba ïatylli kaba shakri kum u païa ba saw jong ka synshar paidbah ha ryngkat bad baroh ka jingngeit kaba ki lah ban lum,” ong ka kyrwoh.

Kumta ka long ka jingkren beiñ jaidbynriew ban khot ïa u dkhot ba la kham rangbah ha ka kam jong ka kynhun ki nongthoh khubor uba la pynskhem da ka tnad Directorate of Information and Public Relations ka Jylla kum u ‘nongwei’ haba u dei shisha u nongshong shnong ka ri India kumba long lem kiwei pat, lait noh lada ka VPP ka kheiñ ïa ki nong India kiba shong ba sah ha Meghalaya kum ki nongwei.

“Ka kynhun ki nongthoh khubor ka shimkhia ban pynphriang ïa ki khubor katkum ka aiñ jong ki lad pathai khubor khlem kano-kano ka jingtieng ne jingshah liang bad khlem da kyrshan palat ïa kano-kano ka seng saiñ pyrthei,” pynkut ka kyrwoh.