Shillong, Rymphang 04
Hadien ba la kut ka jingthep kyrteng jong ki kyrtong kiba don jingthmu ban ïakhun ïa ka ilekshon sha ar tylli ki Autonomous District Council (KHADC & JHADC), ka la don ka jingjah jong uwei na ki kyrtong ka Hill State People Democratic Party (HSPDP) ba ka la dep pynbna ban pynïakhun na Jaïaw-Mawprem konstitwensi kata u Bah Lurshai Lyngwa.
Hadien ba la ïoh jingtip halor kane ka jingbym wan thep kyrteng jong u Bah Lurshai Lyngwa, na ka liang u nonglum khubor u la ïoh ban ïakren lyngba ka ‘phone’ bad u General Secretary ka HSPDP, Bah Panbor Ryntathiang ha kaba u la ong ba na ka liang u Bah Lurshai Lyngwa u la wan dalade ban pan ïa ka tiket ban ïakhun na ka Jaïaw-Mawprem konstitwensi, kumta na ka liang ka HSPDP hadien ba ka la bishar bniah ïa ka jingtyrwa jong u ki la rai ban ai ïa ka tiket sha u.
“U Bah Lurshai u long u rangbah uba don ïa ka jingbahkhlieh ha kaba ïadei bad ka imlang ka sahlang bad ruh u dei uwei na ki Nonghikai jong ka Martin Luther Christian University, kumta na ka liang ka seng da ka mynsiem kaba kmen ba kum u rangbah u long uba la kloi ban mih shakhmat ban ïa tynrong ïa ki kam na ka bynta ka bha ka miat ka imlang ka sahlang, kumta na ka liang ka seng ka la rai ban ai ïa ka tiket sha u Bah Lurshai Lyngwa,” la pynpaw u Bah Ryntathiang.
U Bah Ryntathiang u la pynpaw ruh hadien ka jingai tiket sha u Bah Lurshai Lyngwa, na ka liang u General Secretary ka HSPDP u la ïoh ban ïakren la bun-bun sien ban ïa pynbeit ïa ki jingdonkam ha kaba ïadei bad ki kot ki sla bad tad haduh ka 29 tarik jong u bnai Kyllalyngkot ki dang dep ban ïoh ïakren ha kaba ïadei bad ki ‘form ticket’ kiba ki dei ban ïoh lyngba u Secretary jong ka seng ha kaba na ka liang u Secretary u la dep ban pynbiang.
“Hadien ka jingap kaba la slem ha katei ka sngi na ka liang u Secretary jong ka HSPDP u la phone ïa u Bah Lurshai hynrei kim shym la ïoh ban ïakren bad u, hynrei kane jingleh jong u ka la pynsah ïa ka seng hapdeng ka umdum,” u la ong.
Haba kylli, na ka liang u Bah Panbor u la ong ba na ka liang jong u, um don da kumwei pat ban ong namar ba naduh katei ka sngi kaba u la phone na ka liang u Bah Lyngwa um shym la shim shuh ïa ka phone, hynrei na ka liang ka seng kam shym don kano-kano ka ban kynthoh ne ban kren eiei halor jong u.
