Shah tuh ki arshaka na kylleng& shah prong tuh ka ïing

Ki kam tuh ki ïai kynrei na kawei ka sngi sha kawei pat. Dangshen, ka la don biang ka jingshah tuh jong ki arshaka bad kumjuh ka jingshah prong tuh jong ka ïing.

Shillong, Rymphang 04

Ki kam tuh ki ïai kynrei na kawei ka sngi sha kawei pat. Dangshen, ka la don biang ka jingshah tuh jong ki arshaka bad kumjuh ka jingshah prong tuh jong ka ïing.

Katkum ka khubor kaba la ïoh na ki pulit la ong ba u Bah David Stone Marbañiang u la ujor sha ki pulit ba ha ka step jong ka 1 tarik mynta u bnai, ki runar bym lah ban ithuh, ki la tuh ïa ka arshaka jong u kaba don ïa u registration number ML05-AD-1034 na Mawlai Nonglum Khliehshnong, Shillong.

Ha kawei pat ka khubor, u Bah Wanshai Damiat Jyrwa u la ujor ba hapdeng ka miet 1 tarik bad 2 tarik Rymphang, ki runar bym lah ban ithuh ki la tuh ïa ka arshaka jong u kaba don ïa u registration number ML05-S-0770 na ka shnong Lumdiengsoh, Motinagar, Shillong.

Katba na ka liang jong u Manish Chauhan pat u la ujor sha ki pulit ba ha ka janmiet jong ka 2 tarik Rymphang, ki runar bym lah ban ithuh ki la prong tuh ïa ka ïing jong u kaba don ha Mawpat, Circle-II, Shillong bad ban tuh ïa kawei ka laptop bad ka pisa T.18,500/-, bad kiwei kiwei ki tiar.

Kumjuh, na ka liang jong u Chintu G Momin u la ai ka jingujor ba ha ka janmiet jong ka 30 tarik Kyllalyngkot kata ha ka por 5 baje eiei, ki runar bym lah ban ithuh, ki la tuh ïa ka mobile phone bad uwei u ‘power bank’ na ka ïingsah jong u ha Gabil Bi’sa ha East Garo Hills.

Ha kawei pat ka khubor, u Asst. Manager jong ka North Eastern Region Power System Improvement Project (NERPSIP), Power Grid ha East Khasi Hills u la ai ka jingujor ba hapdeng ka miet jong ka 31 tarik Kyllalyngkot, 2025 bad 1 tarik Rymphang, ki runar bym lah ban ithuh ki la tuh ïa kawei ka ACSR wolf conductor na Mawryngkneng SS Store ha East Khasi Hills.