
Tura, Rymphang 04
U nongtrei mon sngewbha na Tura, u Cherian Momin u la aiti ïa ka dorkhas sha u Myntri kam pohïing ka Sorkar Pdeng, u Amit Shah bad kyntu ïa u ban shim ki sienjam ban pynkhlaiñ ïa ka jingpahara khappud kumjuh ban shimkhia ïa ka jingeh halor ka jingwan buhai shnong be-aiñ sha ka Jylla.
U Momin ha ka dorkhas u la pynsngew ïa ka mat halor ka jingwan tuid ba khlem peitngor jong ki nongwan buhai shnong be-aiñ bad ka jingktah ïa ka imlang-sahlang kumjuh ka ïoh ka kot ïa ki jaidbynriew trai-ri trai-muluk, ka jingkiew kaba shyrkhei ha ka jingshalan tuh ïa ki masi, ki jingdih pynbuaid, bad ki mar ba kongsan sha shiliang khappud, ka jingbym biang ka jingker bad jingpeitngor ha shilynter khappud ka India-Bangladesh ha ka Jylla.
U la pynpaw ruh halor ka jingdonkam kyrkieh ïa ka jingtreikam jong ki jaka rung jaka mih ha ryngkat ka jingpeitngor lyngba ka jingpynshisha ‘Biometric’ bad ka jingdonkam ban pyntreikam ïa ka Inner Line Permit (ILP) ha ka Jylla.
Nalor ka jingwan buhai shnong be-aiñ, u Momin u la kdew ba bun jait ki kam be-aiñ ki ju jia ha ka Jylla namar ka jinglait rynghang ka khappud India-Bangladesh.
Katto-katne ki kam be-aiñ kiba ju jia namar ka jingbym biang ka jingpahara ha khappud katkum ka jingong u Momin ki kynthup ïa ka jingkhaïi tuh ïa ki masi, ka jingkhaïi ïa ki jingdih pynbuaid bad drok be-aiñ, ka jingkhaïi briew bad ka jingkhaïi tuh ïa ki mar ba kongsan.
Khnang ban pynbha ïa ka jingshngaiñ jong ka Jylla baroh kawei, u Momin u la ai jingmut ba dei ban shim ïa ki sienjam ha ka ban pyndep ïa ka jingker sainar ha khappud ha ryngkat ki lad pahara kiba biang, ka jingpyndonkam ïa ki kor ki bor ka juk stad mynta kum ki ‘drone’, ka jingpynkhlaiñ ïa ki shipai BSF, bad ka jingpyntreikam ïa ka Inner Line Permit (ILP) nalor kiwei.