Shillong, Rymphang 04
U State President ka National People’s Party (NPP), Bah Prestone Tynsong ha ka Sngi Ba-ar u la hiar sha Nong-kasen kaba hap hapoh ka Parïong-Mawthadrishan Constituency ban pan jingkyrshan na ka bynta u kyrtong jong ka seng Bah Sharailang Warjri ban ïa aireng ha ka ilekshon MDC.
Haba kren ha kane ka sngi, u Bah Prestone u la ong, ha u snem 2023 ka seng ka rem ïa ka ilekshon MLA namar ka jingshah ther maw kaba jur na baroh ki liang bad baroh ki seng saiñpyrthei ki kren pyrshah ïa ka NPP, ym don kawei ruh ka seng kaba ïaroh ne ban ong ba ka biang bad wat kita ki briew kiba bam ja lang ruh ki kren laiphew jait.
U Bah Prestone u la ong, “Haba la kren than kynmaw U Blei ba najrong u dei u nongbishar na ka bynta ka jong ngi, lada dei kaba shisha kumba ki kynnoh ngim tharai ba ngin ïoh ban synshar hynrei namar ba ngi trei ban shakri hok ïa ka jylla, ban shakri hok ïa ka ri bad jaidbynriew ngi ïoh ka jingkyrkhu bad ban ïoh ban synshar bad mynta khyndiat bnai ngi ïoh syndon ïa ka jingbun paid ki MLA hadien ba ki MLA na kiwei ki seng ki wan pynïasoh bad ka NPP namar ki ïohi ïa kaba kam kaba ngi trei ban shakri ïa ka jylla.”
Une u nongïalam ka NPP u la ong, “Ha ka por ilekshon MLA, MP, MDC bun ki seng ki kdew kti biang ïa ka NPP, kynmaw ha ka ilekshon ba dang shu dep, hangto ruh ki ong ba ka NPP ka dei ka BJP. Nga kwah ban ong ba mynta ka kynti ki don ki kyrtong na kiwei pat ki seng kiban wan ban pyntieng pynsmiej ïa ki paidbah ka Mawthadraishan, ban ong ba sngewbha mih noh na ka NPP, namar ka NPP ka dei ka BJP. Lada ki ong kumta ha kane ka kynti ba mynta, phi ki paidbah ong ïa ki nai wan pynbiej shuh ïa ngi, namar lashai phi ruh lada jop phin leit snoh bad ka NPP.”
U la ong, “Ha ka por ilekshon ki ïa kawang bad ther, hadien ka ilekshon pat sop sop kin wan ban kyrpad ïa u Prestone ban pan jingïarap ine itai, tang shu poi pat sha shnong sha thaw ki ïaid pynheh shadem.”
Une u Nongïalam u la kyntu ïa ki paidbah ba kin ïeng rangbah ban ai ka jingkyrshan kaba pura ïa ka NPP, bad na ka liang ka Sorkar ka ïaleh ban pynpoi ïa ki skhim sha ka konstitwensi bad ki dei ban sngewtrai namar ka dei kaba la mang da ka Sorkar ba lamkhmat da ka NPP.
