Shillong, Rymphang 05
U Returning Officer (RO) ka 19-Jaïaw District Council konstiwensi u la kyrpad ïa u Rangbah Shnong ka Mawlai Mawdatbaki ban ai jingbit ïa ki kyrtong ki ban ïa aireng ha kane ka ilekshon ban pynlong ïa ki jingïalang jong ki.
Ha kaba ïadei bad ki kam ai jingbit ban pynlong ïa ki jingïalang, ka shithi na u RO sha u Rangbah Shnong ka Mawlai Mawdatbaki ha ka Sngi Balang ka ong, “Nga dei ban pynpaw ba ka Sorkar Meghalaya katkum ka shithi ‘No. DCA.56.2024 Part-II, dated.the 30th January, 2025 & No. DCA.56/2024/Pt/4, dated, 31″ January, 2025’, ka la pynmih ïa ki jingbthah kiba donkam ban ai jingbit ïa ki jingïalang na bynta ki seng saiñ pyrthei bad ki ‘Common Platform’.”
“Halor kane, nga kyrpad ïa phi ba phin sngewbha ai jingbit ïa ki kyrtong bapher-bapher kiba ïakhun ba kynthup ïa ki kyrtong shimet na bynta ban pynlong ïa ki jingïalang,” ong ka shithi.
“Kane ka long na ka bynta ka jingmyntoi jong ka jingtip ba bha jong phi bad ban leh ïa kaba donkam,” pynkut ka shithi.
