Shillong, Rymphang 05
U Nongïalam ka NPP ha Meghalaya, Bah Prestone Tynsong uba dei ruh u Symbud Myntri Rangbah ka jylla, u la ong ba ka bha ba jemdaw ban ïa kaba ïap-thngan ki khun ha ïing.
U Bah Prestone u la kren bad pynpaw ïa kane haba ai jingkren ha ka jingïalang ha Marmain ban pan jingkyrshan na ka bynta ka kyrtong MDC ka NPP ka Kong Rona Khymdeit ka ban ïakhun ha kane ka ilekshon na Nongpoh Konstitwensi.
“Don kiba ong ba u Prestone u la pynjemdaw ïa ka jylla da kaba leit ban rah bul sha Delhi. Ki paidbah ki la ïohi ïa kane ka jingkynthoh ha ki rynsan social media. Nga ong bha ba jemdaw ban ba ïap-thngan ki khun ha ïing. U kpa aïu uta na ïing u kob ban rah khaw hynrei shi kilo ruh um lah, kan myntoi aïu lada duk ka jylla Meghalaya,” ong u Bah Prestone.
Shuh shuh u la ong ba kin sa don ki nongpynsngewthuh bakla, ki ban sa ktik bad pynshad ïa ka jabieng jong ki khun samla bad kaba ima ba kane ka lah ban ïalam sha kaba bakla, ko! ki longkmie longkpa, khun samla, wan ban ïatreilang bad ka NPP, bad lada ïohi ba ki don ki bynta ba kum ki Nongïalam ka NPP ki bakla, wan ban ai jingmut ne pynbeit namar ki long kloi ban pdiang jingai jingmut jong phi.
U Bah Prestone haba pynsngewthuh sha ki paidbah u la ong, lada ym ïajan bad ka Sorkar Kmie, ym lah ban leh eiei. “Don ki nongïalam kiba sngew ba ym donkam shuh ïa ka Sorkar Kmie. Ngi ha Meghalaya, ka Sorkar India ka ai 90 persen, ngi pynmih tang 10 persen bad nga shu pyntip ïa phi ba ha ka mang tyngka u snem 2024-2025, ngi la buh 22 hajar klur, na kane, kaba ngim pat ïoh ka jingkheiñ kaba pura halor ki jingpynlut haduh mynta, ka Jylla ka la lah ban pynmih tang 3800 klur, ba tam ïoh na Delhi, lada ym dei ba leit shathie nangno yn ïoh, kaba mut kan tyrkhong ka jylla jong ngi,” u la ong.
