Jowai, Rymphang 05
Ka Dorbar Shnong Tympang Ïawmusiang bad Dorbar Shnong Khimusniang ki la rai ban pynlong beit da ka ‘Common Platform’ na ka bynta baroh ki kyrtong jong ka 18-Jowai North MDC Constituency bad 19-Jowai South Constituency.
U Waheh shnong ka Tympang Iawmusiang, Ma Ajoy Lywait u la ong ba ka tarik ba la pynbeit ban pynlong ïa ka Common Platform na ka bynta ki kyrtong ka 18-Jowai North MDC Constituency kan long ha ka 17.02.2025 ha ka por 6.30 baje janmiet ha Tympang Club Hall khnang ban ailad khlem da ñiew shiliang khmat ïa uno uno u kyrtong (Free and Fair Poll).
Yn don ka khalai nusib na ka bynta ka pali ban kren ha rynsan ha ka por 6:15 baje janmiet thik ïa baroh ki kyrtong. Yn ailad ban kren tang ïa ki kyrtong bad yn ai por 30 minit ia uwei bad kumjuh ban pynkut pat yn ai 10 minit ia u Sitting MDC bad 5 minit na ka bynta kiwei pat.
Yn shah ban synran ïa u kyrtong tang hapoh 10 ngut ki nongkyrshan kiba na shabar ka Shnong bad bym dei ban palat ia ka 10 ngut. Yn shah tang 2 tylli ki kali ban synran ïa u kyrtong.
Baroh ki jinglut ha kane ka Common Platform naduh ka sha, ki kor pynsawa baroh yn pyllut hi da ka Fund shnong.
Katba u Waheh shnong ka Khimusniang u Ma TS Bamon u la ong, ba ka tarik ba la pynbeit ban pynlong iaka Common Platform na ka bynta ki kyrtong ka 19-Jowai South Constituency kan long haka 14.02.2025 ha ka por 7.30 baje janmiet ha Indoor Sports Hall jong ka shnong.
Katkum ka rai jong ka Dorbar shnong naduh ki por mynshwa, yn ym shah ïa ki kyrtong ban ïalam ïa ki paidbah nabar hapoh ka shnong, bad yn shah tang 5 ngut ki briew ba nabar kynthup ïa u kyrtong bad 2 tylli ki kali.
Yn shah tang ïa u kyrtong ban kren bad pynshai ïa ki nongrim kiba u ïeng ïaleh ilekshon bad ka por kan long 30-minute marwei. Ïa ka pali jong ki nongkren yn leh da kaba khalai nusib (Draw of Lots).
Ym shah ïa u/ka nongkren (Canvasser) ban beiñ-khoh ne kynnoh ïa kiwei pat, hynrei ki dei ban kren beit ïa ka nongrim ba ki ïeng ïaleh. Yn ym shah ban ïaid rally ha kano kano ka rukom hapoh u pud u sam jong ka shnong.
Kine ki dorbar shnong ki la kyrpad ïa ki kyrtong ban burom bad kohnguh ïa ki rai jong ki dorbar shnong khnang ba kane ka kam kan long kaba ïaid beit ïaid ryntih.
