Jowai, Rymphang 05
Ka Dorbar Shnong Mynthong, Jowai ka la rai ban buh da ki kyndon ha kaba ïadei bad ka jingïalap ilekshon MDC na ka bynta ki kyrtong sha ka Jaiñtia Hills Autonomous District Council (JHADC).
Kane ka sienjam ba ka dorbar shnong ka la shim dei na ka bynta ban wanrah ïa ka bha ka miat bad ka shongsuk shongsaiñ kumjuh ka khuid ka suba hapoh shnong poh thaw.
Yn shah ban pynlong jingïalang ïalap ilekshon tang hapoh ka Community Hall jong ka Dorbar Shnong Mynthong. Ym shah ban pynlong jingïalang ilekshon ha kiwei pat ki jaka paidbah/madan/hall hapoh u pud u sam ka shnong Mynthong.
Ki kyrtong lane ka seng kin hap ban ïoh jingbit na ki bor District Election ha shwa ban pynlong jingïalang. Ïa ka jingïalang yn pynïaid da u Waheh Shnong, Dorbar Shnong Mynthong. Lada jia ba u Waheh Shnong um lait yn sa aiti ha uwei na ki Office Bearers jong ka shnong.
Ha ka sngi pynlong jingïalang yn shah tang 5 tylli ki kali ban rung shapoh ka shnong kynthup ‘a ka kali ba shong u kyrtong. Yn shah tang 10 ngut ki ban wan Canvas Election nabar Shnong, kata u kyrtong bad 9 ngut kiwei pat ki ban synran ïa u.
Yn shah tang 5 ngut ki ban kren ha ka jingïalang kata u kyrtong bad 4 ngut kiwei pat. Ym shah ïa kiba nabar shnong ban wan sha ka jingïalang ilekshon. Tang ki nongthep vote (Voters) jong ka Mynthong Polling Station ki ban lah ban wan sha ka jingïalang ilekshon.
