Shillong, Rymphang 05
Kawei ka longkmie kaba la sahkut ha nongbah Delhi ka la poi suk sha la ïing ha ka 3 tarik mynta u bnai hadien ba kam tip lynti shuh ban leit shim dawai ïa la u khun sha Chandigarh.
Haba buddien ïa kane ka khubor, la ïoh ban ïakren bad u Bah Marvel Sungoh uba trei ha Delhi, u la ïathuh ba kane ka longkmie kaba dei na ki thaiñ Jaiñtia ka la poi suk sha la ïing myn ha ka 3 tarik Rym-phang 2025 da kaba shong da ka rel.
U la ïathuh ba kane ka longkmie ka la wan sha Delhi ban shim dawai ïa u khun uba la shitom ha ki bynta jong ka kjat. Kumta tang ban ïoh noh ïa ka jingkoit ka la mih na ïing ban leit shim dawai na Chandigarh.
Nalor nangta, u la ïathuh ba kane ka longkmie haba ka la ïohi ïa ka jingbatai lyngba ka social media ka don jingngeit kaba skhem ba u khun un ïoh ïa ka jingkhiah lada kan leit shim dawai na Chandigarh. Hynrei kam poi pyrkhat ynda haba ka la poi sha Delhi ba ka jaka shim dawai ka long kaba jngai ban poi sha Chandigarh.
Kumta, kane ka longkmie ka la hap ban pan jingïarap na u Bah Sungoh ban leit synran shaduh Chandigarh haduh ban da ïoh ïa kata ka dawai.
Shuh shuh, na ka liang u Bah Sungoh u la ïathuh ba kane ka longkmie ka la shim ïa ka dawai ban tah bad dih na bynta u khun uba don ha la shnong.
U la ïathuh ba kane ka longkmie ynda ka la poi sha la ïing ka la ai khublei ïa u namar lada ym don ma u kam tip lynti shuh ban wanphai ne ban leit shim dawai ïa u khun ruh.
Haba ïadei bad khatwei ngut ki samla kiba shah thok haba ki leit trei sha Noida, u la ïathuh ba uwei u la poi sha la ïing katba kiwei pat kin sa wanphai hadien namar kim dap ïa ka bai lynti.
Namar kata, u Bah Sungoh u la kyntu ïa ki khun ba kim dei ban phah ïa ki kmie ki kpa shabar ka jylla haba ki la tymmen hynrei ki dei ban leit synran lang khnang ban shngaiñ ha ka leit ka wan.
U la kyntu ruh ïa ki samla haba ki leit bylla ne leit trei shabar ka jylla ki dei ban da kylli pyrthew bha ïa ka kam khnang ban ym buh jingeh ïa ki bad bahaïing.
