Nongpoh, Rymphang 05
Ki bor ba dei khmih jong ka Meghalaya State Pollution Control Board (MSPCB) ha ryngkat bad ka jingïatreilang bad ka ophis jong u Deputy Commissioner ka Ri Bhoi District ha ka Sngi Ba-ar, ki la leit ban khang khyrdep noh ïa kumba 6 tylli ki karkhana pynmih tdem jaboh kiba don ha ka Export Promotion Industrial Park (EPIP), Byrnihat.
Kitei hynriew tylli ki karkhana kiba la shah khang khyrdep ki kynthup ïa ka Shyam Century Ferro Alloys Pvt Ltd, ka Khasi Alloys Ltd, ka Nalari Ferro Alloys Pvt` Ltd, ka Pawan Casting Pvt Ltd, FW Ferro Tech Pvt Ltd bad ka SR Bio-Product Pvt Ltd.
Kum ban shu kdew hangne, ka thaiñ Byrnihat ka dei kaba la pawnam kum kata ka jaka kaba don ïa ka lyer kaba jaboh tam ha ka ri India baroh kawei mynta la arsien kynthih, kata ha u snem ba la dep bad mynta u snem thymmai ruh. Kumjuh na ka liang jong ki paidbah nongshong shnong bunsien ki ju kynnoh beit ïa ki karkhana kiba don ha katei ka thaiñ ba ki dei ka daw jong ka jingjur ka lyer jaboh.
Hynnin ha ka por miet pat, ki heh ophisar ka MSPCB ki la pynlong biang ïa ka jingleit jurip sa sha ki karkhana kiba don ha 13 Mer ryngkat ka jingbuh ïa ki kor ki bor ban khmih ïa ka jingkhuid ka lyer. Hynrei ha katei ka jingjurip ym shym la lap satia ïa ka jingpynmih tdem jong kitei ki karkhana naba la sakhi ba ki don ki karkhana kiba la pynsangeh treikam bad ki don pat kiba aidaw ba la pynsangeh namar ka jingsniew bad thut jong ki kor ki bor.
Haba kren sha ki lad pathai khubor hadien katei ka jingjurip ha 13 Mer, u Bah YF Laloo, Environmental Engineer ka MSPCB u la ïathuh ba na ka liang ka tnat hi ka ju pynlong ïa kum kine ki jingjurip na ka por sha ka por ha kylleng ka jylla, la ka dei ha ka por mynsngi ne da miet ruh khnang ban lap ïa ki karkhana kiba ïaid lait ïa ki kyndon pynmih tdem jaboh kumba la buh ïa ki bad pyntip ruh ba la sdang ban pynjur ïa kane ka jingjurip naduh ka 24 tarik jong u bnai Kyllalyngkot mynta u snem hadien ki jingujor kiba bun na ka liang jong ki paidbah ka thaiñ Byrnihat.
U Bah Laloo u la ïathuh ba ïa kitei hynriew tylli ki karkhana kiba la khang khyrdep noh la phah ruh ba kin siew ïa ka Environmental Compensation (EC) kaba dei ka khajna halor ka jingpynmih tdem jaboh kaba long shabar jong ka aiñ ne ki kyndon ba la buh pyrshah ïa ki bad pyntip ruh ba na ka liang ka MSPCB ka la daiñ kuna T.4 lak ïa ka Shyam Century Ferro Alloys Private Limited bad T.2 lak ïa ka Khasi Alloys Private Limited.
Na ka liang u Bah Laloo u la pynpaw ruh ba wat hapdeng ki jingeh kiba bun kiba kum ka MSPCB ka ïakynduh khamtam na ka jingduna jong ki nongtrei bad ka jingdon tang kawei ka ophis treikam, na ka liang ka jong ki hi kin dang ïai bteng ban pynlong ïa ki jingjurip na ka por sha ka por ym tang ha Byrnihat, hynrei sha kiwei kiwei ruh ki bynta jong ka jylla katkum ka jingujor jong ki paidbah.
