Shilling, Rymphang 05
Hadien ba la pynsangeh shipor ïa ka jingpynrung kam pulit na ki daw jong ka jingthut ha ki kor ki bor (machine), na ka liang ka Central Recruitment Board (CRB) ha ka 13 tarik u Nohprah 2024 ka la ïoh ban sdang biang sa shisien ïa ka Physical Efficiency Test (PET) jong baroh san tylli ki Battalion, ka 1st MLP Battalion Mawïong Shillong, ka 2nd MLP Battalion Goeragre, ka 3rd MLP Battalion Sahbseiñ Jowai, ka 4th MLP Battalion Sohpian Nongstoiñ, bad ka 5th MLP Battalion Samanda Williamnagar.
Ha ka jingïakren bad ki nonglum khubor, na ka liang ki khynnah ki la pynpaw ba ka jingmareh ka la long kaba kham eh namar ka jingbun jong ki samla kiba wan ban pyndep ïa ka PET. Ki la pynpaw ruh ba ha kane ka wat ba mynta ka jingïakhun ka la long kaba kham jwat ha kaba baroh kiba wan ban leh ïa ka PET Test ki long kiba khlaiñ bad ki don jingkyrmen ba kin ïoh ban pynkhreh bha ha ka’ written examination’ bad kumjuh ïa ka ‘personal interview’ .
Kine ki samla ki la pynpaw ruh ka jingsngewkmen ba ki bor pynïaid ki la lah ban leh kham kloi ban pyndep ïa ka PET bad ki don ruh ka jingkyrmen ba na ka liang ka CRB kan lah ban pyndep kham kloi ïa ka ‘written examination’ bad kumjuh ïa ka ‘personal interview’.
Haba ïoh ban ïakren bad u Chairman ka Central Recruitment Board (CRB), u Dalton P Marak (IGP), u la pyntip ba ka jingdon ki samla kiba thep ïa ka kam pulit ki don kumba 1 lakh 70 hajar tam bad kumba 2 hajar tam ki khynnah ki wan ban leh ïa ka PET test ha ka shisngi ha baroh san tylli ki MLP Battalion.
U Marak u la pyntip ruh ba ki samla kiba wan ban leh ïa ka PET test kin hap ban rah ïa ki ‘admit card’ kiba la dep ban ‘download’, nangta pat ki hap ban leh ïa ka jingpeit bniah ïa ki kot-sla, kin rung sha ka jaka thew jingjrong bad nangta pat kin hap ban phong ïa ka RFID jackets bad nangta pat ki shim ïa ka bio- metric jong ki kyrtong khnang ba yn lah ban pynshisha la u kyrtong u dei ne em uba thep kam bad uba wan ban mareh bad hadien kata ki khynnah kin sa lah ban rung sha madan ban pyndep ïa ka jingmareh.
Haba kylli, na ka liang u IGP u la ong ba ki don katto- katne ki samla kiba la ai jingujor halor ka jingbakla ban kheiñ ïa ki wat (round) jong ki hynrei u la pynshai ba ki samla kim dei ban kheiñ ïa ki wat tang mar sien rung sha madan hynrei ki dei ban kheiñ tad ynda ki la dep ban mareh shi wat.
U la ong ruh ba lada ki samla ki don kano-kano ka jingsngew bynñiaw ha ka jingkheiñ ïa ki wat kiba ki mareh, na ka liang ka CRB ka ai ka lad ïa kine ki samla ba kin lah ban khmih ïa ki jingmareh kiba ki la dep ban buh ‘record’ lyngba ki kor ki bor ka juk mynta.
