Shillong, Rymphang 05
U kyrtong ka Voice of the People Party (VPP) na Jaïaw, Bah Denzil R. Chen ha ka Sngi Balang u la ujor sha ka District Election Officer (DEO) ka East Khasi Hills halor ka jingbym ai ‘No Objection Certificate’ (NOC) na bynta ban pynlong ïa ka jingïalang paidbah ha Mawlai Nongmali.
“Nga kwah ban ujor pyrshah ïa u Rangbah Shnong ka Mawdatbaki namarba u la kyntait ban ai jingbit na bynta ban pynlong ïa ka Jingïalang Paidbah ha ka 6 tarik u Rymphang, 2025 ha Nongmali katkum ka shithi ba la thoh ha ka 5 tarik Rymphang, 2025. Kane ka dei ka jingpynkheiñ ïa ka hukum ‘No.DCA.56/2024/Pt./3 dated 30.01.2025’ ba la pynmih da u Deputy Secretary jong ka Sorkar Jylla, ka tnad District Council Affairs,” ong u Bah Chen ha ka shithi sha ka DEO.
“Namarkata, nga kyrpad ïa phi ban shim ïa ki sienjam kiba donkam haduh kane ka janmiet lym kumta kan pynbor ïa nga ban shim ïa ki sienjam donkam ba mardor bad ban shimkhia ïa kane kajuh hakhmat ki bor ba dei peit na ka bynta ban pynbeit ïa ki jingeh jong nga,” u la ong.
Ha kawei ka liang, ka ophis jong ka Dorbar Shnong Mawlai Mawdatbaki, Mawlai, lyngba ka shithi na u Rangbah Shnong, Bah B.R. Kharmujai ha ka 5 tarik Rymphang, 2025 sha u Bah Chen halor ka jingbym lah ban ai jingbit, ka la ong, “Katkum ka shithi ba phi la phah sha nga ha ka 4 tarik Rymphang, 2025 halor ka jingkyrpad ban pynlong ïa ka ‘Public Meeting’ ha ka 6 tarik Rymphang, 2025 ha ka por 7:00 baje janmiet ha ïing jong i Kong Krim Nongrum, nga sngewbha ban pynpaw bad pyntip sha phi ba ngin ym lah shuh ban ai namar ngi la dep rai ha ka jingïalang komiti jong ka shnong kaba la shong pyrkhat kam ha ka 28 tarik Kyllalyngkot, 2025 ba ngin shah tang ïa ka ‘Common Platform’.”
Ka shithi ka ong ba kane kan long ruh ka lad ka kabu ïa baroh ki Kyrtong ban ïoh ïashim bynta lang khlem da don kano-kano ka jingleh shiliang na ka liang jong ka shnong.
“Ka jingbuh jong ngi ïa ka ‘Common Platform’ kan long ruh kum shi bynta ban weng ïa ki jingeh jong ki paidbah, ba bun ba ngi lah ju mad ban tuh ïa ka por ym tang ïa ki nongkitkam kam shnong bad kumjuh ïa ki kyrtong,” ong ka shithi.
“Nga kyrmen skhem ba phin pdiang ïa kane bad ngeit skhem ruh ngin ïatreilang na ka bynta ka jingbit jingbiang lang jong baroh,” pynkut ka shithi.
