Shillong, Rymphang 06
U Lamphang ka Ïingdorbar Thaw Aiñ ka Jylla, Thomas Sangma u la pyntip ba ka Dorbar Mang Tyngka jong u snem 2025-26 kan long naduh ka 28 tarik u Rymphang haduh ka 13 tarik u Lber ban wan.
Kane ka Dorbar Mang Tyngka kan neh haduh 10 sngi, ha kaba lai sngi la mang sha ki kam jong ki MLA shimet-shimet (Private Member), katba hynñiew sngi pat kan dei na ka bynta ki kam jong ka Sorkar (Government Business).
U Lamphang u la pyntip ïa kane ka rai hadien ba la wai ka jingïalang pyrkhat kam jong ka Business Advisory Committee (BAC) ka Ïingdorbar Thaw Aiñ kaba la long ha ka Sngi Palei.
Ha kane ka jingïalang pyrkhat kam la don lang ruh u Symbud Myntri Rangbah ka Jylla ba khmih ïa ka tnat Parliamentary Affairs, Bah Prestone Tynsong, u Nongïalam ka Liang Pyrshah, Dr Mukul Sangma, u Nongïalam ka Trinamool Congress, Bah Charles Pyngrope, u Nongaibuit ka Sorkar, Bah Lahkmen Rymbui bad kiwei-kiwei.
Haba kylli la ka jingai por ba tang lai sngi ka la biang na ka bynta ki kam jong ki MLA shimet-shimet, u Lamphang u la ong ba lai sngi ban ïakren ïa ki kam jong ki MLA shimet-shimet ka la biang palat. “Kane ka dei ka Dorbar Mang Tyngka, lai sngi yn buh ban ïakren ïa ka Mang Tyngka bad ar sngi ïa ka jingkren lamphrang u Lat ka Jylla”, u la ong.
U Thomas Sangma u la pynthikna ruh ba baroh ki dkhot kin ïoh bha ïa ka lad ban ïashim bynta ha ki jingïatai. U la ong ba ka por kan pahuh ïa baroh ban ïashim bynta.
“Lada jia ba duna ka por, ngi lah ban pynjlan ïa ka por shong dorbar wat ha ka Sngi Thohdieng”, la ong u Lamphang.
Haba kylli halor ka jingbym pat lah ban pynlong ïa ka dorbar hapoh ka Ïingdorbar Thaw Aiñ bathymmai ha Mawdiangdiang, u Lamphang u la ong, “Ngam kwah ban leh kyrkieh kum u khliehduh ka Ïingdorbar, ka dei ka kamram jong nga ban pynthikna ïa ka jingshngaiñ ïa baroh ki dkhot (MLA). Ngi la don ka jingjia kham mynshwa kaba ktah ïa ka jingshngaiñ jong ka jingtei, ha kane ka kynti ngim lah ban shim sting. Ka bha ba kham slem ban ïa kaba ym long. Wat la ngim pat lah ban pynlong mynta nga tharai ha ka dorbar synrai ngin sa pynlong noh hapoh ka Ïingdorbar bathymmai”.
