Shillong, Rymphang 06
Ka North Eastern Elec-tric Power Corporation Limited (NEEPCO) ka angnud ban pyntrei ïa ka projek bording ka Umïam Hydroelectric Project kaba la sahteng mynta la kham bun snem na ka daw ka jingpyrshah jong katto-katne ki nongshong shnong kiba shah ktah na ka jingpyntrei ïa kane ka projek.
Ha ka jingïakren bad u Major General Rajesh Kumar Jha (AVSM) (Retd) Director (Personnel) ka NEEPCO, u la pynpaw ba naduh ba la sdang ka jingïasoi soskular bad ka Sorkar Jylla, ka jingthmu jong ka NEEPCO ka long ban pyntrei ïa ka Wah Umïam Hydroelectric Project ha ki lai bynta.
U Jha u la pynpaw ruh ba naduh ba ki la dep ban ïasoi ïa ka soskular bad ka Sorkar Jylla, na ka liang ka NEEPCO kam pat shym la ïoh ban pyntrei kano-kano ka projek hapoh ka jylla.
“Ka NEEPCO ka la don ka jingthmu ban pyntreikam da ki buit thymmai na ka bynta ka Umïam Hydroelectric Project” u la ong.
Ka NEEPCO ka la don ka jingthmu ban pyntreikam da ka ‘pump storage’ ha kaba kin lah ban ring um napoh ka wah Umïam bad ban pynlang ha ki jaka kiba kham kynjang khnang ba yn lah ban pyllait ha ki por ba don kam khamtam ha ka por mynstep bad janmiet ha kaba ki paidbah ka Jylla ki donkam.
“Ka NEEPCO ka la dep ban pynbiang ïa baroh ki jingdonkam na ka bynta kane ka projek bad mynta ka dang ap ïa ka NOC kaba ki dei ban ïoh na ka Sorkar Jylla” u la pyntip shuh shuh.
U Jha u la ong ruh ba ha kine ki khyndiat sngi u la ïoh ban ïakynduh bad u Commissioner & Secretary Sanjay Goyal IAS kumjuh bad u Chief Secretary ka jylla Bah D.P Wahlang ban ïakren halor kane ka bynta.
U la ong ruh ba ynda ki la ïoh ïa ka NOC na ka Sorkar Jylla ka NEEPCO ka long ba la kloi ban pyntreikam noh ïa kane ka projeck bathymmai na ka bynta ka wah Umïam Hydroelectric Project.
