Shillong, Rymphang 06
Ka jingjied ïa ki nongmihkhmat bathymmai sha ar tylli ki District Council kata sha ka Khasi Hills Autonomous District Council bad Jaiñtia Hills Autonomous District Council kan long ha ka 21 tarik mynta u bnai bad la ïohi ba ka jingpynkhreh jong ki kyrtong ruh ka la ïaid shaid-shaid shakhmat.
Ha kane ka kynti kaba mynta, yn sakhi ruh ïa ka jingïakhun jong ki shikmie shikhun, kata ka Kong Grace Mary Kharpuri kaba dei ka kmie kum ka kyrtong jong ka NPP kan ïakhun na ka Nongshken Konstitwensi, katba u khun jong ka, u Ethan Kharpuri un ïakhun na Shella Konstitwensi na kajuh ka seng.
U Ethan Kharpuri u ban ïakhun ha ka sien kaba nyngkong eh ïa ka ilekshon MDC u dei u khun shynrang ba lai jong ka Kong Grace Mary napdeng san ngut shipara.
Lah ban kdew ba ka Kong Grace Mary Kharpuri kaba la ïakhun nyngkong ïa ka ilekshon MDC ha u snem 2009, ka la jop kum ka kyrtong shimet. Ha u snem 2014 ruh ka la ïoh jingjop haba ka la ïakhun na ka HSPDP bad ha u snem 2019 ruh ka la ïoh jingjop hadien ba ka la mih kum ka kyrtong NPP bad kane ka kynti kaba mynta kan dei ka sien ba saw.
Ka jingpynkhreh jong kine ar ngut shikmie shikhun ïa kane ka ilekshon ka la ïaid shaid-shaid bad mynta kan shong sa ha ka rai jong u paidbah, ïa kaba yn sa lah ban tip tad haduh ka 24 tarik kaba dei ruh ka sngi pynbna ïa ka risol jong ka ilekshon MDC.
Nalor ki shikmie shikhun, ha kane ka kynti lah ban sakhi ruh ïa ka jingïakhun jong ki shi ‘Bakha’ trai, kata ka jingïakhun hapoh ka Nongspung-Sohïong Konstitwensi, kata hapdeng u kyrtong ka UDP, Bah Synshar Kupar Roy Lyngdoh Thabah uba dei ruh u MLA pyrshah ïa u kyrtong ka Congress, Bah Nathaniel Osbert Rymmai.
La ong ba ka jingïakhun mynta ka kynti ha Nongspung-Sohïong Konstitwensi kan long kaba itynnad bad kaba ïakhaid bha, namar baroh ki kyrtong ki long kiba khlaiñ bor bad ïa ka rai kaba khatduh yn sa lah ban tip tad haduh ka 24 tarik mynta u bnai, mano napdeng ki hynriew ngut kyrtong kiba ïakhun ha kane ka ilekshon kin ïoh ïa ka jingjop.
