Shillong, Rymphang 06
U MDC ka Mawlai konstitwensi uba dei kyrtong shimet ha kane ka ilekshon MDC, Bah Teiborlang Pathaw u la khyrwit tyngeh ïa u President ka Voice of the People Party (VPP), Bah Ardent M Basaïawmoit uba la kynnoh ïa u MDC ba u la shu leh MLA jubor.
“Nga la shah kynnoh ba nga la shu leh MLA jubor. Haba ym don ba lah ban trei, haba u paidbah u la pynkup bor kumno ngan shu shong ha ïing, phi mut ngan shu bam ei ïa ka tulop MDC khlem da trei na ka bynta ka bit ka biang u paidbah. Kumba nga la kren lada donkam ïa u paidbah ba ngan leh MP ngan leh na ka bynta ka bit ka biang ka shnong Mawlai jong ngi”, la ong u Bah Pathaw.
Ha ka jingïalang ïalap ilekshon ka VPP, u Bah Ardent u la pynmih da ki jingkynnoh ba bun jait ïa u MDC ba mynta, ha kaba u la kynnoh ba u dei u khun khatduh jong ka NPP ha ka por ba u dang don ha ka seng.
Halor kane, u Bah Pathaw u la ong ba wat la ki kynnoh ba u dei u khun khatduh ruh, tangba ka jingïohnong ka dei ïa u paidbah ka Mawlai.
“Kaba sngewsih ba kita ki kyrtong kiba ka VPP ka pynïeng ki dei ki kyrtong bad ki nongmihkhmat kiba ngi khot ki ‘si sam khmut, kiba hap ban ap shwa ïa ka rai ki bor ba halor ban leh ïa kano-kano ka kam hapoh Mawlai konstitwensi. Haba kumta dang lah u khun khatduh ne dang lah u ‘si sam khmut?”, la ong u MDC ka Mawlai.
Haba kaba ïadei bad ka jingkynthoh u Bah Ardent ïa ka kam ba u la trei, kaba ai kam ïa ki hajar ngut ki nongshong shnong ym tang jong ka shnong Mawlai hynrei jong ka Jylla kumjuh, u Bah Pathaw u la ong, “Nyngkong i ïaroh ïa nga ba nga dei uwei uba mih ban trei hadien pat i byrngem ïa nga. Phi (Ardent) mut ban ong kumno, lada wan ma phi ha ka bor phin pynduh kam ïa nga, phi pyrkhat kumno na ka bynta ki longïing kiba ïoh kam na ka kti ba sbun kaba nga trei?”, u la buh jingkylli.
U Bah Pathaw u la ong shuh-shuh ba u dang mut ba u Bah Ardent u wan ïalap ilekshon ban kren ïa ki nongrim ba ka seng jong u kan leh, hynrei u beiñ u khoh pynban ïa u kum u MDC.
“Hato phi (Ardent) ïa lajong phi la leh aïu na ka bynta ka ri bad ka jaidbynriew?”, la buh jingkylli biang u Bah Pathaw.
“Nga lap ka tieng mynta, lada ki wan ma ki (VPP) ha district council lashai, ki ai licence ïa ki bar jylla ba ïakhun kam bad nga, ka lah ban poi ka por ba kita kiba ai licence ka seng VPP ki lah ban ïoh kam ma ki ngan duh noh ma nga u Khasi”, u la ong.
“Ngam kwah ban beiñ, katta phi (paidbah) la ïohi ha ki ‘common platform’ ngi baroh san ngut ngim beiñ, i (Ardent) wan shapoh Mawlai nalor ba i khlem sah shuh hapoh Mawlai, ha shnong Mawlai i beiñ ïa u Bah Pathaw”, u la ong.
