Shillong, Rymphang 06
Katba kiwei ki seng saiñpyrthei kiba don ha ka Jylla ki la khih khohreh bad bun kam ïalade na ka bynta ka ilekshon MDC sha ar tylli ki Autonomous District Council (ADC) ha Khasi Hills bad Jaiñtia Hills, hynrei ka All India Trinamool Congress (AITC) kaba don 4 ngut ki MLA hapoh ka Ïingdorbar Thaw Aiñ jong ka Jylla ka la pynpaw ba kam sngew donkam ban ïashim bynta da kaba sei kyrtong ha kane ka ilekshon MDC sha KHADC bad JHADC ka ban sa long ha ka 21 tarik mynta u Rymphang.
U Nongïalam ka All India Trinamool Congress (AITC), Dr Mukul Sangma ha ka Sngi Palei u la ong ba ka TMC ka la shim ïa rai ban ym pynïakhun kyrtong ha kane ka ilekshon MDC sha ar tylli ki Autonomous District Council (ADC).
Haba kylli, une u Nongïalam ka TMC ha ka Jylla u la ong ba ka seng ka sngew ba kam long kaba donkam ban ïakhun ha man la ki ilekshon khamtam kum ha ki ilekshon jied MDC.
“Ngi la shim lang ïa ka rai ba ngim sngew donkam ban ïakhun ha man la ki ilekshon khamtam ha ka ilekshon sha ki district council”, la ong u Dr Mukul uba dei ruh u Nongïalam ka Liang Pyrshah hapoh ka Ïingdorbar Thaw Aiñ ka Jylla.
U Dr Mukul u la ong ba ka TMC ka sngew ba donkam ban phai khmat biang kumno ban pynkhlaiñ shuh-shuh ïa ka seng, khamtam ban pynkhlaiñ ïa ka naduh tynrai, namar lada ym lah ban pynkhlaiñ naduh tynrai kam don jingmut.
Lah ban kdew ba hapoh ka jingïalam u Bah Charles Pyngrope kum u President, ka All India Trinamool Congress ka la dei kawei na ki seng kaba la aireng tyngeh bha ha ka ilekshon MLA ha u snem 2023 khamtam ha ka thaiñ Garo Hills, hynrei kam shym lah ban poi sha ka thong ba la buh hadien ba ka la jop tang 3 ngut ki MLA na Garo Hills bad 1 na Khasi Hills.
