Shillong, Rymphang 06
U Syiem jong ka Hima Mawsynram u Pa’iem Amossingstar Malngiang bad 12 ngut ki dkhot jong ka Seng Khasi Hima Mawsynram ki la dawa na u Sub Register Society ka East Khasi Hills District ban pynduh pyndam noh ïa ka kyrteng Seng Khasi Hima Mawsynram hadien ba ki don ki nongïalam jong katei ka seng kiba la pyndonkam bakla ïa ka iktiar.
Kane ka jingdawa ka dei namar u nongïalam jong kane ka seng uba la pyndonkam bakla ïa ka iktiar ha ka por ba u long Secretary ka Hima Mawsynram ha u snem 2015 ban kam trai ïa ka Krem Mawjymbuiñ haduh ba kiwei ki jaidbynriew kiba dei na kawei ka jait niam ki la mut ban wan lehniam jubor ha ka krem Mawjymbuiñ.
Ka jingdawa jong u Syiem ka Hima Mawsynram ban pyndam ïa katei ka kyrteng ka dei hadien ba ki khatar ngut ki dkhot jong ka Seng Khasi Hima Mawsynram ki la phah da ka shithi ban iehnohkam na katei ka seng sha u bad sha u Sub Register Society East Khasi Hills namar kim don jingtip eiei namar la shu pyndonkam ïa ka kyrteng jong ki na ka bynta ka jingmyntoi shimet jong ki nongïalam katei ka seng.
Kine ki dkhot ki la pynpaw ka jingsngewsih ban tip ba la pyndonkam bakla ïa ka kyrteng jong ki ha kane ka seng naduh ba la seng ïa ka hynrei ki dang tip mynta ba ki dei ki dkhot jong ka Seng Khasi Hima Mawsynram.
Kine khatar ngut ki dkhot kiba la iehnohkam ki long u Bah Smatsting Langpen, Bah Dlanson Langpen, Kong Srulda Kynter, Bah Render Ronsang, Bah Tising Pdahkasiej, Bah Shanborlang Langpen, Bah Khlaiñbor Kynter, Bah Dratsing Langpen, Bah Everky Langpen na Kenmynsaw, Bah Shemphang Kynter bad Trailang Langpen na Kenbah bad Bah Aibor Disiar na Mawkaphan.
Haba ïakren bad u Pa’iem Amossingstar Malngiang ha ophis treikam ka Hima ha Mawsynram u la kyntait mardor ba ka hima kam shym la ai jingbit ïa ka Seng Khasi Hima Mawsynram namar ka la mih tang namar uwei u nongïalam u kwah ka jingmyntoi shimet ban leh ïa ka niam ka rukom.
U la ong kane ka jingsoi tuh ïa ki kot ki sla ban kam trai ïa katei ka krem lyngba ka Seng Khasi Hima Mawsynram ka long tang ban kamai spah na kiwei ki jaidbynriew kiba thmu ban wan lehniam.
U la ong biang ba ka hima ka la phah bun tylli ki shithi sha u Sub Register ban pynduh pyndam noh ïa ka Seng Khasi Hima Mawsynram namar kane ka seng ka la wanrah ïa ka huri-hura ha ka imlang ka sahlang.
Ha kajuh ka por u la ïathuh ba ki khatar ngut ki dkhot jong kane ka seng ki la weng noh ïa ka jinglong dkhot namar la shu pyndonkam bakla ïa ka kyrteng jong ki khlem ka jingtip jong ki.
