Nongstoiñ, Rymphang 06
U District Magistrate ka West Khasi Hill District, Bah Garod LSN Dykes, IAS, ha ka kyrwoh khubor u la pyntip ba la pyntreikam da ka kyndon 163 BNSS 2023 kaba khang bad mana pyrshah ïa ki trok, kali heh kiba kit jingkit ban ïaid na ka surok “Nongstoiñ-Rambrai-Kyrshai Road Project”, khamtam lei na ka shnong Kynroh (jan MeECL Machine), Lawdibah, Sohmynthar bad haduh ka shnong Mawthir.
U District Magistrate ha ka kyrwoh khubor u la ong ba ka jingïaid jong ki kali heh ba kit jingkit ka pynsniew lut ïa kine ki surok ba dang pyntrei shaid-shaid kum ki nala, surok thymmai, ka jingtih pyndap khyndew bad kiwei kiwei.
Shuh shuh u la ong ruh ba kino-kino kiba ïaleh pyrshah ïa kane ka jingmana yn pynsaja katkum ki kyndon jong ka aiñ 223 BNS Act 2023.
U la ong ruh ba kane ka hukum kan treikam noh mardor tad ynda pynbna da kumwei pat.
