Nongpoh, Rymphang 06
Ki nongïalam jong ka Ri Bhoi Peoples Council (RBPC) ki la pynrem jur ïa ki bor pynïaid ka PA Sangma International Medical College (PIMC) jong ka University of Science and Technology Meghalaya (USTM) halor ka jingpyllait ïa ki Health Shuttle ne ki kali kit nongpang kiba la pynrung kyrteng sha Assam bad ym sha Meghalaya.
Haba kren sha ki lad pathai ha ka janmiet ka Sngi Palei, ki la ong ka jingpynrem ka seng ka dei hadien ba u Myntri Rangbah ka jylla, Conrad K Sangma ha ka step Sngi Palei u la pyllait paidbah ïa kumba 10 tylli ki Health Shuttle jong ka PIMC kiba kynthup ïa san tylli ki AC Bus bad san tylli ki Urbania Van ha ïingsah ka jong u ha nongbah Shillong.
U Bah Jayson Lennox Nongrum, President ka RBPC u la ong ba wat la ka skulbah USTM ka dei kaba don hapoh u pud u sam ka jylla Meghalaya, hynrei ym don eiei kaba long Meghalaya hapoh katei ka skulbah naba wat ki khajna kiba dei ban ai sha jylla Meghalaya ruh, katei ka skulbah ka pynkiew bad ai beit sha ka jylla Assam.
Ka jingkynthoh u nongïalam ka RBPC ka dei hadien ba la sakhi baroh kitei ki kali Health Shuttle kiba la pyllait paidbah da u Myntri Rangbah ka jylla ki dei kiba la register sha ka jylla Assam bad kum ka seng ka ñiew ba kane ka dei ka jingñiew beiñ ïa u khlieh duh ka jylla Meghalaya.
U Bah Jayson u la buh jingkylli ruh ba balei katei ka skulbah USTM ka leit ban pynrung kyrteng ïa kitei ki kali sha ka jylla Assam ha ka jaka ban pynrung kyrteng bad ai khajna sha ka jylla Meghalaya, wat la ka sorkar Meghalaya ka don ryngkat bad theh ruh ïa ki lad jingïarap sha katei ka skulbah na ka por sha ka por.
Halor katei ka jingbym pynrung kyrteng ïa kitei ki kali sha ka jylla Meghalaya, u Bah Jayson u la ong ba lada ka don ka jingshah pynthut sha ka jylla Assam, ka Sorkar jylla ka hap ban shimkhia ban nym mih kum kita ki jingeh bad dawa ruh ba dei ban pynkylla noh ïa ka registration ïa kitei ki kali sha ka jylla Meghalaya.
Utei u nongïalam ka RBPC u la kynthoh ruh ba kane kam dei shuh ka sien ba nyngkong ba ka skulbah USTM ka ju kyntiew bad rah ïa ka jylla Assam da kaba kynthoh ruh halor ka jingpyndonkam katei ka skulbah ha man la ki prokram da ki Gamcha ka jylla Assam ha ka jaka ki jaiñ ryndia kiba dei ka burom jong ka jylla Meghalaya.
Shuh shuh, u Bah Jayson u la ong kumba katei ka skulbah ka dei kaba don ha ka jylla Meghalaya, hynrei wat ïa ki jingpynbna khubor lane kita ki advertisement, bunsien katei ka skulbah ka ju pynïoh nong bad ai tang sha ki khubor ka jylla Assam bad dawa ba katei ka skulbah nangne shakhmat ka dei ban pyrkhat thymmai bad ban ai shwa ïa ki kot khubor kiba don ha jylla kum ka jingburom ïa ka jylla kaba la ïarap bad kyntiew ïa ka ban long kum ka skulbah kaba ai jingmyntoi ïa ki khun samla ka thaiñ shatei lam-mihngi hi baroh kawei.
