Shillong, Rymphang 06
Ka jingshah tuh jong ki arshaka bad ka jingshah prong tuh jong ki ïing, nalor kiwei ki kam tuh kam thiem, ka dang bteng na kawei ka sngi sha kawei pat haduh ba ka la wanrah ïa ka jingbym shngaiñ shuh la ïa ki trai ïing ne ki trai jong ki arshaka.
Katkum ka khubor kaba la ïoh lum na ki pulit la ong ba u Vishal Deb u la ai ka jingujor ba hapdeng ka miet jong ka 3 bad 4 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AD-3365 na ka phyllaw ïing ka jong u kaba don ha Keating Road, Shillong.
Ha kawei pat ka khubor, u Bah John Paul Basaiawmoit u la ai ka jingujor sha ki pulit ba ha ka 3 tarik mynta u bnai, ki runar bym lah ban ithuh ki la tuh ïa ki waïar bording kiba shongdor haduh kumba T.50 hajar na ka ïing kaba dang don hapdeng ka jingtei ha Shyiap, Langkyrding-A, ha nongbah Shillong.
Kumjuh, na ka liang jong u Rajendra Sinha u la ai ka jingujor sha ki pulit ba ha ka 3 tarik mynta u bnai, ki runar bym lah ban ithuh ki la prong tuh hapoh ka ïing ka jong u, kaba don ha Goraline Road, Laitumkhrah, Shillong, ha kaba ki la ïoh ban tuh ïa kawei ka Apple ipad, kawei ka tyndong lyer shet jingshet (LPG cylinder), ka pisa kaba long T.2,500 bad kiwei ki kot ki sla kiba don.
Ha kawei pat ka khubor, la ong ba ha ka step jong ka 5 tarik mynta u bnai, ki runar bym lah ban ithuh ki la tuh ïa kawei ka arshaka kaba don ïa u registration number ML04-D-8539 na ka shnong Lumchyrmit, Mihmyntdu, Jowai ha West Jaiñtia Hills.
