Jowai, Rymphang 07
Ka Kiang Nangbah Govt. Collage, Jowai kaba don ha West Jaiñtia Hills District ka la shah jied ban shim bynta ha ka ‘Pilot Phase’ jong ka ‘Swavalambini Women Entrepreneurship Programme’ kaba dei ka sienjam jong ka tnat Skill Development and Entrepreneurship (MSDE) ryngkat ka jingïatreilang bad ka NITI Aayog.
Ïa ka ‘Swavalambini Women Entrepreneurship Programme’ la sdang mynta ka sngi halor ka jingthmu ban kyntiew ïa ki samla pule kynthei da ki sap ban seng kam seng jam, ka jingai jingmut, bad ka jingkyrshan ban kyntiew ïa ka kam.
Ïa ka jingïalang la plie da u Jayant Chaudhary, Minister of State (Independent Charge), MSDE, uba la pynpaw ïa ka jingdonkam jong ki karkhana ba la ïalam da ki kynthei ha kaba kyntiew ïa ka roi ka par.
Ka Anna Roy, nongai jingmut ba ha khlieh duh jong ka NITI Aayog, bad u Atul Tewari Secretary jong ka MSDE, ki la ai ruh ka jingkren ha kane ka jingïalang.
Ha ryngkat bad ka Kiang Nangbah Government College, West Jaiñtia Hills, la jied sa 8 tylli kiwei pat ki Higher Education Institution (HEI) ha Meghalaya, Mizoram, bad Assam.
Ha Meghalaya – Ri-Bhoi College (Ri-Bhoi) bad ka North Eastern Hill University (NEHU, Shillong). Ha Mizoram -Government Champai College, Lunglei Government College bad Mizoram University. Ha Assam – Gauhati University, Handique College, bad ka Dispur College.
Baroh ki samla pule kynthei na kine ki jaka pule kin ïashim bynta ha kane ka Entrepreneurship Awareness Program (EAP), ha kaba 300 ngut la jied na ka bynta ka Entrepreneurship Development Program (EDP).
Ka jingthmu ka kynthup arphew-wei taïew (hynriew bnai) jong ka jinghikai bad jingkyrshan da kaba thmu ban seng ym duna ïa ka 30 tylli ki karkhana ba la ïalam da ki kynthei.
Ka jingjied ïa ka Kiang Nangbah Government College ka dei ka sienjam kaba kongsan ban kyntiew ïa ka kam seng kam seng jam jong ki kynthei ha West Jaiñtia Hills, kaba ai ïa ki samla pule ïa ki sap ki phong kiba donkam ban seng ïa la ki jong ki seng kam seng jam.
