Tura Rymphang 07
Kawei ka kynhun na Phulbari, West Garo Hills ka la aiti ïa ka jingujor sha u ophisar ka GHADC-Raksamgre Range Office halor ka jingkynnoh ba ka don ka jingpyntrei be-aiñ ïa ka karkhana ot-dieng kumjuh ka jingpynkit ïa ki dieng ha ka shnong Rongsai kaba hap hapoh Raksamgre Sub-Division.
Ka kynhun kaba khot ïalade kum ka A’chik Dedicated Integrity Leaders (ADIL), ka la kynnoh ba katei ka karkhana ot-dieng be-aiñ ka la ïaid khlem ka jingbit ne jingmynjur ba donkam na ki bor ba dei khmih. Katkum ka jingong ka seng, ka jingpynkit be-aiñ ïa ki dieng na katei ka karkhana ot-dieng ka ju jia ha ki kynta ka por miet. Haba kdew ba ka jingpyntreikam ïa katei ka karkhana ot-dieng ym tang ba ka long kaba be-aiñ hynrei ka buh jingma ruh ïa ka mariang, ka seng ka la kyntu ïa ka tnad ba dei khmih ban pynlong ïa ka jingtohkit halor kane bad ban leh ïa kaba donkam pyrshah ïa kito kiba donkti ha ka ban pyntrei be-aiñ.
