Shillong, Rymphang 07
U Vice President ka United Democratic Party (UDP), Bah Robertjune Kharjahrin u la ong ba ka Article 371 bad ka Khyrnit ba Hynriew kim dei kijuh, hynrei ki jingthmu ki poi sha kajuh ka thong.
U la ong ba ka jingkren jong kiba bun ïa ka Article 371 ka dei eh halor ka bynta ba ki aiñ jong ka Sorkar India kin ym treikam ha ki jaka jong ki riewlum, bad ïa kata lah ban leh da kaba pynkylla biang ïa ka Para 12A jong ka Khyrnit ba Hynriew, bad lada pyntreikam ïa ka Article 371 kan don ka jingïatyngkhuh bad ki kyndon jong ka Khyrnit ba Hynriew bad kan don jingeh ban pyntreikam.
“Kiba ngi kham ïakren mynta ka dei ïa ka Article 371 A & G kiba ong ba ki aiñ jong ka Sorkar India kin ym treikam halor ka khyndew ka shyiap, ki riti ki dustur ha ki jaka ba ka Article 371 ka treikam. Ka jingmut jong ki ka ïasyriem, hynrei kim dei kijuh. Ka khyrnit ba Hynriew ruh ka wanrah ïa ka bor synshar da ki riewlum, ka jingthmu hi ka long ban ïada ïa ka khyndew ka shyiap, ki marpoh khyndew, ki snap kiba kyrpang, ka riti ka dustur jong ka jaidbynriew ka jong ngi”, u la ong.
U la ong, namar ba ka don ïa kajuh ka jingthmu kan don ka jingeh ha ka ban pyntreikam lada ki wan baroh ar tylli, bad kumba long ha ka Jylla Mizoram ha ka por ba wan ka Article 371, ka Mizo District Council ki pynduh noh bad mynta ki don tang ki district council na ka bynta ki riewlum rit paid ba kynthup ïa ki Lai, Chakma bad Mara kiba dei mynshwa ki regional council hapoh ka Mizo District Council.
“Mynshwa ki Lai, Chakma, Mara ki dei ki regional council ha Mizoram, hynrei hadien ba pynduh noh ïa ka Mizo Autonomous District Council hadien ba wan ka Article 371, kine ki hap ban shim noh ïa ka kyrdan hapoh ki district council. Lada ngi ïaid da kajuh kumba leh ha Mizoram, ka mut ki ban ïoh ïa ki district council kin dei ki riewlum rit paid, ki lah ban dei ki Koch, ki Hajong bad kiwei. Hato ngi pdiang ban leh ïa kata?”, la ong u Bah Robert.
U Bah Robert u la ong ruh ba ki riewlum rit paid ha kane ka Jylla kim shong kim sah shi jaka, hynrei ki shong khleh kylleng-kylleng, bad kan eh ban tip ïa ki jaka ba don ma ki bad ïa ka jingbun paid jong ki.
“Ha ka jingsngewthuh jong nga, lada ngi pyntreikam ïa ka Article 371 kan don ka jingïatyngkhuh bad ki kyndon jong ka Khyrnit ba Hynriew bad kan don jingeh ban pyntreikam. Kawei na kine kan sa jah noh, kata ka dei ka jingma”, la ong u Nongïalam ka UDP uba dei ruh u nongïasaid aiñ.
“Lada ngi kwah ban ïoh jingïada ïa kata ka jaidbynriew jong ngi na ka jingpyntreikam ïa ki aiñ jong ka Sorkar India, kiba lah ban ktah matïong ïa ka khyndew ka shyiap ïa ki marpoh khyndew bad ïa ka riti ka dustur jong ngi ka long ba ngi dei ban dawa pynkylla biang ïa ka Para 12A, lada ngi lah ban leh kumta ka mut ngi ïoh ïa kajuh ka jingthmu”, la ong u Bah Robert.
