Shillong, Rymphang 07
Ka Hynñiewtrep Achik National Movement (HANM) sengkmie ha ka 7 tarik u Rymphang, 2025, ki la leit ban ïakynduh ïa u Chief Engineer jong ka tnad MeECL ha ka ophis treikam jong u kaba don ha Lumjingshai ban pan jingpynshai halor ka jingïoh pyntrei ka kompani Star Infratech kaba dei ka kompani nabar ka Jylla ïa ka Project Revamped Distribution Sector Scheme (RDSS) ba la bei tyngka da ka Sorkar Pdeng kaba long da ki phew klur tyngka.
Haba kren sha ki lad pathai khubor, u samla Bawan Nongsiej u la ong ba ka seng ka dap da ka jingsngewdiaw ban ïoh jingtip na u Chief Engineer uba peit ïa katei ka projek ba katei ka kompani ka la ïoh ban pyntrei ïa ka projek khlem da pynbiang ïa ki kot ki sla da kaba pynrem ruh ïa ka tnad MeECL kaba la aikam ïa katei ka kompani khlem da khot ïa ki trai Jylla kiba dei ki Khasi.
“Kaba pynsngewdiaw bad pynsngewsih ïa ka seng ka long ba bunsien haba ngi phai sha baroh ki kam hapoh ka Jylla jong ngi, ki ïoh beit kiba nabar ka Jylla; kane ka long kaei-kaei kaba pynduh mynsiem ïa ki paradoh-parasnam jong ngi kiba don ïaka bor bad ka lad ban trei ïa ki kam”, ong u samla Bawan.
Shuh-shuh, u samla Bawan u la ïathuh ruh ba na ka liang ka seng ka la bthah ïa u Chief Engineer ban pynsangeh noh shisyndon ïa katei ka kompani tad haduh ba kan da pynbiang shwa ïa ki kot ki sla ba donkam bad lada kam lah ban leh ïa kata, na ka liang ka seng ka dawa ban khot ‘tender’ noh da kawei bad ban ai ban trei pat da ki Khasi.
U samla Bawan u la ïathuh ba ïa katei ka projek la pyntrei ha kylleng ka Jylla kum ha Jaiñtia ba la pyntrei da ki Khasi-Pnar, ha East Khasi Hills, ha South West Khasi Hills bad ha Ri Bhoi pat la pyntrei da ka kompani nabar ka Jylla.
