Shillong, Rymphang 07
U Director ka College Development Council (CDC) ka North Eastern Hill University (NEHU), Dr. D.R.L. Nonglait ha ka Sngi Thohdieng u la ong ba kam long kaba suk ïa ka skulbah bathymmai ban ai ïa ka jingpynïasoh (Affiliation) sha ki kolej bapher-bapher khamtam sha kito (ki kolej) kiba kham heh.
“Ngi ïohi lyngba ki lad pathai khubor ba ki don katto-katne ki kolej na Ri-lum Garo kiba kwah leit pynïasoh noh bad ka ‘State University’, hynrei haduh mynta ngim pat ïoh khubor eiei ba ki kwah ban weng noh ïa ka jingpynïasoh na ka NEHU,” ong u Dr. Nonglait haba kren sha ki lad pathai khubor.
Hashuwa, u Myntri Rangbah ka Jylla, u Conrad K. Sangma u la plie ïa ka skulbah banyngkong eh jong ka Jylla – “Captain Williamson Sangma State University”.
Haba ban jur ba ka Jylla ka la donkam la slem ïa ka ‘State University’, u Dr. Nonglait, ha kawei ka liang u la ong ba um don jingtip eiei la kane ka skulbah bathymmai ka long ne em kaba la biang haba ïadei bad ki nongtrei lane ka jinghikai ha ki jingpule bapher-bapher.
“Kam dei kaba suk ïa kano-kano ka skulbah ban ai ka jingpynïasoh sha ki kolej namar ka skulbah ka dei ban don ïa ki ophisar kiba khlaiñ, ki tnad pule bad ki nonghikai kiba biang…kum ngi hangne ngi don ïa ka CDC, ngi don ïa ka ‘Exam Department’ kaba khlaiñ bad kiwei-kiwei. Hangne ngi don ïa ka Engineering Department, ka Campus Development Department bad na bynta ki jingjurip ngi donkam lut ïa kine baroh,” u la ong.
Ha kajuh ka por, u la ong ba lada ym don ïa ki tnad pule kiba ki kolej ki tyrwa lyngba ki tnad pule bapher-bapher, ha kata ka skulbah, kata kan buh jingeh shi kat dei wat tang ban saiñdur ïa ka ‘Syllabus’.
Haba kdew ba nalor ka ‘Syllabus’, ki dei ban don sa ki nongpynkhreh jingkylli kiba tbit, u Dr. Nonglait u la ong ba dei ban don sa ki ‘riewshemphang na ka skulbah ki ban peit bniah la ki jingkylli ki long ne em katkum ka rukom long ka jingkwah jong ka skulbah.
Haba ban biang ba kam long kaba suk ïa kano-kano ka skulbah kaba thymmai (kaba mynta-mynta) ba kan ai jingpynïasoh ïa ki kolej khamtam ïa ki kolej kiba heh, une u nonghikai u la ong, “Lada kata ka skulbah kam don ïa ki tnad pule kiba ki kolej ki hikai – kata haba ïadei bad ki ‘riewshemphang, ki hap ban shaniah beit na kiwei pat ki skulbah.”
Haba poi biang sha ka bynta bad ïadei bad ka jingpynïasoh jong ki kolej, u la ong, “Ha ka jingshisha ka dei ban lah, hynrei kumba ka long long mynta, kumba ngi ïohi ïa ka jinglong-jingman jong kane ka ‘State University’, ngam ïohi ba kan lah ïa ka ban leh ïa kaba dei kum ka skulbah na bynta ki kolej kiba la pynïasoh.”
Na ka liang jong u, u la ong ba kam dei kaba suk ban seng ïa ka skulbah, namar kaba kongsan eh ka dei ka jingkyrshan pisa, bad sa kawei lehse ka lah ban long ka jingtlot jong ka tnad treikam ha ka liang ka jingsngewthuh ïa ka rukom pynïaid ïa ka skulbah.
“Lada ka tnad pule-puthi kam don ïa ka kynhun kaba khlaiñ ka ban pynkhreh na bynta ban seng ïa ka skulbah…ban shu shong tang ki komiti ha ki tnad treikam, khlem ki ‘riewshemphang kiba tip bha haba ïadei bad ka rukom pynïaid ïa ka skulbah, te kin ym lah ban seng ïa ka skulbah kaba heh,” u la ong.
Shuh shuh u la bynrap, “Kumba ka long mynta nga ïohi kumba kam pat long ka skulbah (State University) kaba la biang, hynrei nga kyrmen ba ha ki snem ban wan, ka Sorkar Jylla kan shim ki lad ki lynti kiba kham khlaiñ, ban don ka jingïamir jingmut, ban kynthup ïa ki ‘riewshemphang na bynta ban pynbit-pynbiang ïa kane ka skulbah bad ban peit ba ki nongtrei kin long kiba la pyntbit.”
Haduh mynta, ki kolej ba kynthup ïa ki ‘General’ bad ‘Professional Course’ kiba pynïasoh bad ka North Eastern Hill University ki don kumba 87-88 tylli.
