Jowai, Rymphang 07
Ka Jaiñtia Hills Development Society (JHDS) ryngkat ka jingïatreilang bad ka District Social Welfare, West Jaiñtia Hills District ha ka 7 tarik Rymphang ka la pynlong ïa ka ‘Awareness Program’ halor ka phang ‘Ka jingma jong ka jingshongkha khynnah’ ha ka shnong Thadsning.
Ïa ka jingïalang la pynïaid da u Bah Francis Langleiñ uba long u Field Program Associate ka JHDS ha ka jingwan ïashim bynta 44 ngut ki samla kynthup katto-katne ki longkmie katei ka shnong.
La donlang u Coordinator ka JHDS, Bah Denis Kurkalang, u President ka Seng Samla Catholic Mihmyntdu Bah Francis Phawa, ka Kong Amabilis Lamare President Ïasnohktilang VO bad kiwei de ki Sahep Sorkar.
La ïoh ka jingkren pynshai halor ka phang da ka Kong Yohi Kyndait ‘Gender Specialist’ ka tnat Social Welfare kaba la ban jur halor ki katto-katne ki jingktah ka shongkha khynnah kiba kynthup ka jingktah ha ka met ka phad, ka jingmut jingpyrkhat nalor kiwei-kiwei.
Ka Kong M.L. Suchiang Assistant Legal Aid Defence Counsel jong District Legal Service Authority, ka la batai shai halor ka ‘Free Legal Aid’ bad ka Prohibition of Child Marriage Act 2006.
La ïoh ruh ïa ka drama lyngkot halor ka phang ïa kaba la shim bynta da ki Para-legal Volunteer Jowai Unit.
