Shillong, Rymphang 07
Ka Ïingkashari Meghalaya High Court ha ka Sngi Thohdieng ka la hukum ïa ki bor Sorkar ba kin pynsangeh shwa ka jingpom ïa ki dieng bad ban bishar thymmai ïa ki rai khnang ban pynthikna ba ka jingpom ka dei ban long kat kum ka lynti jong ka aiñ.
Haba pynmih ïa ka hukum hadien ba la shong bishar ïa ka PIL halor kane ka kam, ka ïingkashari hapoh ka jingbishar u Chief Justice IP Mukherji bad u Justice W Diengdoh ki la ong, “Haba ïadei bad ka rai ba la dep shim ban shah pom ïa ki dieng, hynrei ka jingpom ka bym pat ïaid haduh mynta, ki bor ba dei khmih ki dei ban pynsangeh shwa ka jingpom ïa ki dieng bad bishar biang ïa ka rai ban pynthikna ba ki la ïaid kat kum ka lynti ka aiñ”.
Ka ïingkashari ka la hukum ruh ïa ki bor Sorkar ban ïathuh ïa baroh ki aplikeshon ba dang sahteng ban pynkhyllem ïa ki dieng ha East Khasi Hills.
“Ki dei ban pynthikna ba baroh ki aplikeshon kin ïaid bad shim rai kat kum ka aiñ bad ka rule. Ka dei ban ïathuh kumno la pynïaid ïa ka kam bad ka jingmih na kawei-pa-kawei na kine ki aplikeshon ba dang sah”, la ong ka hukum.
“Lada ka lah don ka jingpynkhyllem be-aiñ ïa ki dieng ka bym lah leh eiei shuh, ngi bthah ba ha kano-kano ka jaka ba pynkhyllem ïa kine ki dieng, ki nongshah mudui ki dei ban shim ïa ka sienjam ban thung biang kumjuh ïa ki dieng kiba dei hi kijuh ki jait dieng, khnang ban pynjyrngam biang ïa ka thaiñ kumba ka long”, ka la bynrap.
Ïa kane ka PIL la mudui da u Bah Geralding G Shadong uba kyrpad ïa ka ïingkashari ban pynsangeh ïa ka jingpom dieng be-aiñ da ki bor Sorkar ha ka thaiñ Lower New Colony, Laitumkhrah.
Hynrei, haba khmih ïa ka rukom long, ki jingktah jong kane ka mudui, ka ïingkashari ka la rai ban kynthup ïa baroh kawei ka East Khasi Hills District hapoh kane ka mudui bad kane ka hukum.
Ha kane ka mudui, u nongmudui u la ïeng halor ka nongrim jong ka Meghalaya Tree (Preservation) Act, 1976 bad ka Meghalaya Tree (Preservation) Rules, 1976, kaba ong ba shwa ban ai jingbit ban pom ïa ki dieng hapoh ka Jylla, dei ban da thoh aplikeshon da u Divisional Forest Officer ha Form-I jong ka Rules, ka ban pynbud da ka jingtohkit jong u Divisional Forest Officer shwa ban ai jingbit.
