Shillong, Rymphang 07
U Myntri Rangbah ka Jylla, Conrad K Sangma ryngkat ka Myntri ba khmih ïa ka tnat ka Koit ka Khiah kaba dei ruh ka MLA jong ka East Shil-long, Kong M Ampareen Lyngdoh ha ka janmiet Sngi Palei ki la leit ban jurip ïa ka MUDA Shopping Complex ha Laitumkhrah, kaba ju tip ruh da ka Ïew Shyllong bad ka Ïew Laitumkhrah.
Kane ka jingjurip jong u Myntri Rangbah ka long ban bishar ïa ka jingïaid jong ka kam ban tei thymmai ïa kane ka ïew.
Kane ka ïew ka la kylla dpei na ka jingpluh ding ha u snem 2022, hynrei mynta ka la ïeng biang da ka jingtei mala (Building) kaba ka jingtrei ka la ïaid stet bha ban pyndep ha ka por ba la buh.
Ha kane ka jingjurip, u Myntri Rangbah bad ka MLA ki la ïakynduh ruh ïa ki nongshong dukan ha Ïew Shyllong, kiba la pynpaw ïa ka jingkmen ban ïohi ba ka jingtei ka la sdang ban wan dur, bad katei ka jingtei ka la dep kumba 60 percent eiei.
Hadien ba la dep ban tei ïa kane ka ïew la khmih lynti ba kan dei kawei na ki ïew shnong ba heh duh ha Shillong hadien ba la plie ïa ka.
Haba pynpaw ïa ka jingsngewhun halor ka jingïaid jong ka kam jong jingtei ïa ka ïew thymmai, ka Kong Ampareen ka la ong ba kane ka jingleit jurip ryngkat bad u Myntri Rangbah ka Jylla ka long ban tip ïa ka jingïaid jong ka kam.
“U Myntri Rangbah ba donburom, ha ryngkat bad ma nga, ngi la jurip ïa kane ka jingtei thymmai jong ka ïew Laitumkhrah ban peit ïa ki kam kiba la ïaid haduh mynta” ka la ong.
Ka la pyntip ruh ba ka jingtei ïa kane ka ïew la buh ban pyndep ha u Lber 2026, bad hadien ba la pyndep, ha kane ka ïew yn ai jaka ban shong dukan haduh kumba 500 ngut ki briew kiba khaïi bad die ïa ki mar bapher-bapher kynthup ïa ki mar bam bad kiwei-kiwei.
“Kane ka ïew kan don ruh ïa ki dukan bam ban pyni nam ïa ki bam trai shnong, nalor ki dukan ot doh bad ki jaka thang ïa ki jaboh ban pynthikna ïa ka jingkhuid jingsuba ha kane ka ïew” la ong ka Myntri.
Lah ban pynkynmaw hangne ba ha ka 28 tarik Risaw 2022, ka ding kaba shyrkhei ka la klang bad ka la bam duh ïa ka Ïew Laitumkhrah bad pynkylla dpei haduh 84 tylli ki dukan, bad katkum ka jinglum jingkheiñ ba la leh da ki Pulit, ka jingjulor ka la kot kumba T.1 klur.
