Nongpoh, Rymphang 07
Kum shi bynta ban kyntiew ïa ka ïoh ka kot jong ki nongthaiñ jaiñ ka them Ri-Bhoi, ka Indian Oil Corporation Limited (IOCL) lem bad ka ophis jong u Deputy Commi-ssioner ka Ri-Bhoi District ha ka Sngi Palei ki la ïoh ban soi soskular sngewthuh jingmut lane ka Memorandum of Understanding (MoU) ban pyntreikam ïa ka projek ai jingïarap kaba kyrpang ïa ki nongthaiñ jaiñ ka distrik lyngba ka skhim Corporate Social Responsibility (CSR) jong ka IOCL.
Ïa kane ka soskular sngewthuh jingmut la ïasoi hapdeng ki nongïalam ka IOCL bad u Abhilash Baranwal, Deputy Commissioner ka Ri-Bhoi District ryngkat ka jingïadon lang jong kiwei-kiwei ki ophisar jong ka District lem bad ki nongthaiñ jaiñ ka thaiñ kaba la pynlong ha kamra treikam jong u DC ka Ri-Bhoi.
Haba kren sha ki lad pathai khubor, u Raja Brahma, Additional Deputy Commissioner u la ïathuh ba lyngba katei ka jingsoi sngewthuh jingmut bad ki bor pynïaid District ka Ri-Bhoi, ka IOLC lyngba ka skhim CSR kan sam haduh 254 tylli ki tiar thir ksai kiba la tip kum ki ‘Solar-Powered Eri Spinning Unit’ ki ban buh ha ki 30 tylli ki Center jong 30 tylli ki shnong ka Ri-Bhoi District kiba don bynta ha ka kam thaiñ jaiñ ryndia.
U Brahma u la pyntip ruh ba lyngba katei ka skhim CSR, ka IOCL ka la mang pisa haduh T. 62.98 lak na ka bynta kitei ki tiar thir ksai jong kitei 30 tylli ki Center kum shi bynta ban kyntiew ïa ki nongthir ksai bad thaiñ jaiñ, kumba ka Ri-Bhoi District ka dei kaba pawnam ban pynmih ïa ki jaiñ ryndia ha ka jylla, ka ri bad ka pyrthei hi baroh kawei.
