Shillong, Rymphang 07
Ka Khasi Students’ Union (KSU) Sengkmie ha ka sien ba ar ka la ïoh ban pynlong biang sa shisien ïa ka eksam na ka bynta ban jied ïa ki samla ban leit shah hikai pyntbit na ka bynta ban ïakhun ïa ka eksam ‘Union Public Service Commission (UPSC) Civil service’ ha nongbah Delhi.
Ha ka jingïakren bad ki nongthoh khubor, u Assistant Secretary ka Education Cell, Bah Richest Malngiang, u la ong ba na ka liang ka seng kan sa jied ïa ki khynnah kiba wan shakhmat ba kin ïoh ban leit pyntbit sha Delhi na ka bynta kane ka eksam.
“Ki la don kumba 103 ngut ki khynnah kiba la wan ban thoh ïa kane ka eksam kiba kynthup ïa kiba sah ha Shillong bad na kiwei pat ki thaiñ nongkyndong”, u la ong.
“Ka seng kan jied beit tang ïa ki khynnah kiba wan shakhmat bad na ka liang ka seng kan sa peit haduh katno ngut kan ïoh ban phah sha Delhi ha kane ka kynti ba mynta” u la bynrap.
“Ka seng kan sa bishar bniah ha kaba ïadei bad ka jingpynlut na ka bynta kine ki samla, lada ki samla ki dei kiba wan na ki longïing baduk na ka liang ka seng kan ai ka jingkyrshan kaba shispah na ka shispah, hynrei lada ki samla ki dei kiba na ki longïing kiba kham bit – kham biang na ka liang ka seng kan ïakren bad kine ki samla”, u la ong.
Ka seng ka la shim ïa kane ka sienjam namar bun ki samla ki thrang ban ïakhun ïa kane ka eksam hynrei kim lah pat ban leit shah hikai pyntbit ha ki jaka kiba kham biang kum ha nongbah Delhi na ka daw ba ki jingjynjar ha ïing ha sem. Namar kata, ka seng ka la mih shakhmat ban shim ïa kane ka sienjam ka ban long ka lad na ka bynta ki khun samla ba kin lah ban leit pyntbit shuh-shuh ïa ki jingthrang jong ki.
U Bah Malngiang u la pynpaw ruh ba naduh u snem 2013 kim pat shym la don ki samla Khasi ki ban pass ïa ka eksam jong ka UPSC Civil Service, dei na kane ka daw kaba la pynlong ïa ka seng ba kan plie ïa kane ka lad ïa ki samla.
Kum ban pynkynmaw, ka KSU ha u snem 2023 ka la phah lai ngut ki samla na ka jylla ban leit shah hikai pyntbit ha nongbah Delhi ban ïakhun ïa ka eksam UPSC.
