Shillong, Rymphang 09
Ka Hynñiewtrep Youth Development Council (HYDC) Mawryngkneng Circle ha ka 8 tarik u Rymphang ryngkat ka jingïatreilang bad ka Sohryngkham Circle ka la pyntip ba ka la shim ïa ka sienjam ban pynlong da ka rynsan ïatai nia ne ka Panel Discussion cum Debate na ka bynta hynriew ngut ki kyrtong ban aireng ha kane ka ilekshon MDC na 6-Sohryngkham MDC Constituency ka ban pynlong ha ka 15 tarik u Rymphang, 2025 hapoh ka Mini Stadium jong ka shnong Mawryngkneng.
Haba kren sha ki lad pathai khubor ha Shillong Press Club, u President ka HYDC Mawryngkneng Circle, Bah Robin Nongrum u la ong ba ha katei ka jingïatai yn shah tang ïa ki kyrtong ban kren khnang ba ki paidbah ka konstitwensi kin ïohsngew ïa ki nia bad ka thong kaba kum ki kyrtong ki don ha shwa ban poi sha ka sngi thep vote.
U la ong ruh ba ha kane ka jingïatai yn ym shah satia ïa ki kyrtong ba kin phah da ki nongïalam ne ki nongkyrshan jong ki seng jong ki hynrei kin hap wan kren beit dalade hi.
“Ka thong ka long beit ba ngi kwah ba ki paidbah nongshong shnong jong ka Sohryngkham kin ïohsngew bad kin ïoh ban ïadon bynta beit markhmat bad ki kyrtong”, ong u Bah Robin.
U Bah Robin u la ïathuh ba la dep phah jingthoh sha baroh hynriew ngut ki kyrtong bad napdeng kine hynriew ngut ki kyrtong kiba la pynthikna ban wan ïashim bynta ki long lai ngut kata u kyrtong na ka Congress, na ka NPP bad u kyrtong ka KHNAM.
Shuh-shuh, u Bah Robin u la ong ba kum ka kynhun kam ïadon bynta satia bad kano-kano ka seng saiñpyrthei hynrei ki long tang kum ki nongpynïaid ïa katei ka prokram ïatai nia.
U Bah Robin u la khot bad wer ruh ïa baroh ki nongshong shnong jong ka konstitwensi ba kin ïapoi lem ha katei ka sngi khnang ba kin ïoh ban sngap ïa kaei kaba ki kyrtong ki don ban kren.
