Shillong, Rymphang 09
U General Secretary ka United Democratic Party (UDP), Dr Jemino Mawthoh, u la kynthoh tyngeh ïa ki katto-katne nongïalam jong ki seng saiñ pyrthei kiba la sdang ban ïalam bakla ïa ki paidbah da kaba kynnoh ba ka UDP ka dei ka seng sdien bos. U la ong ruh ba dang lah ka sdien bos ban ïa kaba phasi ïalade.
Haba ai jingkren ha ka jingïalang ïalap ilekshon na ka bynta u kyrtong ka seng na Nongthymmai, u Dr. Jemino u la ong haba ngi peit ha ki ‘social media’ ka jingshah beiñ bad ka jingshah khoh jong ka seng ka la long shaba palat, lada ngi leh kano-kano kaba bha ruh ngi shah beiñ ngi shah khoh.
“Ka UDP ka dei ka party sdien bos”. U la ong ba ka jingshah beiñ shah khoh jong ka seng ka dei namar ba kim don daw da kumwei pat ïa ka seng”, u la ong.
U Dr. Jemino u la pynkynmaw ha ki por ba la leit noh ha kaba ïadei bad ka jingkhaïi dewïong beaiñ, u Myntri kam pohïing ha kato ka por u dei na ka seng NPP bad na ka liang ka UDP kaba ïadonlang ha ka sorkar sdien bos ki la dawa ba dei ban hiar shuki ïa u Myntri ym dei ba ngi sngap jar.
“Haba ïadei bad ka MeECL, ka seng ka buh ïa shiphew tylli ki mat kiba ïadei bad ka jyrsieh bamsap hapoh katei ka tnad, na ka liang ka seng ka la dawa na ka sorkar ba la dei ban pynhiar shuki noh ïa u Myntri ba khmih ïa ka tnad bording bad kumjuh ïa u CMD, bad ka sorkar ka la leh kumta” u la ong.
U Dr. Jemino u la pynkynmaw ruh ha kaba ïadei ban thaw ïa ka sorkar kaba khlem ka NPP, na ka liang ka UDP ka la dep ban ïakynduh bad baroh ki seng saiñ pyrthei naduh ka Congress, TMC, NCP, HSPDP bad VPP.
“Nga la shu pyrkhat ha lade ba lada ngi ïa thaw kum kata ka sorkar kaba khleh khawlang bad ‘National Party’ bad ‘Regional Party’ tip ka ban neh ne kam neh tang shi bnai” u la ong. U la buh jingkylli, ban kumta dang lah ban sdien bos ne sdien phasi ïalade.
Haba kynthoh halor ka jingmih jong ka seng riewlum bathymmai, u Dr. Jemino u la ong ba ha ka ilekshon kaba la dep ha u 2023 da ym dei ba mih sa ka seng bathymmai nangne na Nongthymmai la tikna ban ïoh ïa ka jingjop.
“Ym dei tang nangne hynrei la kam mih ka seng bathymmai ban pynpait-pynpra ïa ka seng nga tharai ka UDP kam duna ban ïoh ïa ka 20 seat ha kane ka Assembly Election” u la ong.
U Dr. Jemino u la bynrap ruh da kaba ong ba lada ka UDP ka jop 20 seat kane kan long ka jingshngaiñ ïa ka jaidbynriew ha kaba ngin ïoh ban shong ha Assembly ban saiñdur ïa ka lawei jong ki khun ki kti jong ngi bad ïa kane ka jylla kaba ieid jong ngi.
Ha kane ka jingïalap ilekshon la ïoh ruh ka jingkren na u kyrtong ka Nongthymmai, Bah Desmond L Mawlong uba la buh ka jingkyrpad ïa ki paidbah ban ai lem ïa ka kti kamon ka kti kadiang ban pynjop ïa u ha kane ka kynti ba mynta. U la ong ruh ba kum u samla un peit ïa kaei kaba ki paidbah ki thrang khamtam ha kaba ïadei bad ka jingpynneh-jingpynsah ïa ka riti ka dustur. Ha kane ka sngi la ïoh jingkren ruh na u Bah Robertjune Kharjahrin.
