Shillong, Rymphang 09
Ka kynhun jong ka BJP hapoh ka jingïalam u MLA, Bah Sanbor Shullai, ryngkat u State-President, u Rikman G .Momin bad kiwei-kiwei ki heh nongïalam ka seng, ki la ïakynduh ïa u Myntri Khynnah ka tnad kam ïada ri ka Sorkar Pdeng, u Sanjay Seth ha u bnai ba la dep ban pynsngew sha u halor ka jingkiew ba kynsan-kynsan jong ka khajna bai-wai jaka, kaba la ktah shi kat dei ïa ki nongshim wai jong ka thaiñ Shillong Cantonment.
Na ka liang u Bah Shullai u la kyrpad ïa ka Shillong Cantonment Board kaba hap hapoh ka Directorate General of Defence Estate, ban ïaid shakhmat bad ka jingtohkit ban khmih ïa ka rukom pynkiew ïa ka STR ha u snem 2009, kaba long ruh ka jingpynkheiñ ïa ka kyndon ba la buh ha ka 1937 CLAR.
“Ki dor kiba la sakhi ïa ka jingkiew kaba ïaryngkat naduh u snem 1999, kynsan-kynsan la sakhi ïa ka jingkiew kaba ïapher ha u snem 2009, ha kawei ka liang kaba la ktah jur ïa ki nongshong shnong,” ong u MLA ka ka kyrwoh.
U Bah Shullai u la pynpaw ruh ba ka jingïakhun ban ïoh ïa ka hok kan ïai bteng haduh ban da pynbeit ïa kane ka kam ha ka liang jong ki nongshong shnong.
Ka kynhun kaba la ïakynduh ruh ïa u Director General ka DGDE, u G.S. Rajeswaran, ka don ka jingkyrmen skhem ba yn sa lah ban pynbeit noh kloi ïa kane ka kam.
Shuh shuh Bah Shullai u la ong ba u lah ban khot sngewbha ïa u Myntri Khynnah ka tnad kam ïada ri ka Sorkar Pdeng ha u bnai Ïaïong naba u Myntri u la pynpaw ïa ka jingangnud kaba khraw ban wan jngoh ïa ka Shillong.
U MLA u la ong ba ka Meghalaya-BJP ka thrang ban wad ki lad ki lynti ban weng ïa ki jingeh kiba ktah ïa ki nongshong shnong; ban pyntikna ba kan ym don kano-kano ka jingïapher hapdeng ki nongshong shnong jong ki jaka Municipal bad Cantonment ha kaba ïadei bad ki khajna.
“Wat ha ki por ban wan, ka Meghalaya-BJP kan ïaleh pyrshah ïa kano-kano ka jingbym ïahap ha ka liang ki khajna, la ka long ha ki jaka Municipal ne jaka Cantonment,” la ong u Bah Shullai.
