Imphal, Rymphang 09 (UNI)
U N. Biren Singh u la hiar shuki noh kum u Myntri Rangbah ka Jylla Manipur.
U la aiti ïa ka shithi iehnoh kam jong u ha u Lat ka Manipur, u A.K. Bhalla ha ka Sngi U Blei.
Ha ryngkat ka jing-synran lang u President ka seng, A. Sharda, ki Myntri, u Sambit Patra lem bad katto-katne kiwei pat ki MLA, u N. Biren Singh u la leit ban ïakynduh ïa u Lat ka Jylla bad aiti ruh ïa ka shithi iehnoh kam jong u.
U Myntri Rangbah u la her mar-mar sha Delhi ha ka Sngi Saitjaiñ bad wanphai ha ka Sngi U Blei ryngkat u Sambit Patra. Hadien ba u la wan phai sha Imphal, u la aiti ïa ka shithi iehnoh kam jong u.
U Singh ha katei ka shithi u la ong ba ka la long ka burom ïa u ban shakri ïa ki paidbah ka Manipur haduh mynta. U la pynpaw ka jingsngewnguh ïa ka Sorkar Pdeng na ka bynta ki jingshimkhia ha ka por kaba biang, ki jingïarap, ki kam pynroi bad ka jingpyntreikam ïa ki projek bapher-bapher na ka bynta ban ïada ïa ka bha ka miat jong uwei-pa-uwei u nong Manipur.
Ha kajuh ka por, u la kyrpad ïa ka Sorkar Pdeng ban bteng ïa kajuh ka kam.
U la kyrpad ruh ïa ka Sorkar Pdeng ban pynneh-pynsah ïa u pud u sam bad ka jaka jong ka Manipur kaba don ïa ka histori kaba riewspah bad kaba ïar jong ka imlang-sahlang lah da ki hajar snem mynta.
Kumjuh, u Singh u la kyrpad ïa ka Sorkar Pdeng ban tehlakam ïa ki jingwan rung tuh ha ki jaka khappud bad ban thaw ïa ka mat treikam na ka bynta ban phah leit phai biang ïa kito ki nongwan rung be-aiñ.
Shuh shuh u la kyrpad ïa ka Sorkar Pdeng ban bteng ïa ka jingïakhun pyrshah ïa u drok bad ka jingdonkti jong ki kynhun lehnoh ha ki kam khaïi drok. U Singh u la kyrpad ban bteng ruh ïa ka rukom treikam kaba la pynkylla thymmai bad kaba pyrkhing jong ka FMR da kaba pyntreikam ïa ka ‘biometric’ ha ka rukom kaba pyrkhing.
Ka kynrum-kynram ha ka saiñ pyrthei ka la mih hadien ba ki MLA ka BJP ki la ïakhih pyrshah ïa u N. Biren Singh. Lah ban kdew hangne ba ka Dorbar jong ka Ïing Dorbar Thawaiñ ka Manipur kan sdang lashai ka sngi.
