Shillong, Rymphang 09
Ka Dorbar Shnong Wahingdoh ha ka 8 tarik u Rymphang, 2025 ka la pynlong da ka rynsan ïathir ne ka ‘Common Platform’ na ka bynta ki kyrtong ban aireng ha ka ilekshon MDC sha ka Khasi Hills Autonomous District Council (KHADC) na ka Mawkhar-Pynthorumkhrah Konstitwensi ïa kaba la pynlong hapoh ka ïing shnong jong ka Dorbar Shnong Wahingdoh.
Ha kane ka sngi la wan ban ïashim bynta da baroh ki kyrtong na ki seng saiñpyrthei bapher-bapher kiba dei na ka Mawkhar-Pynthorumkhrah Konstitwensi kiba kynthup ïa u kyrtong shimet Bah Diton John Wahlang, u Bah Raymond Basaïawmoit na ka KHNAM, u Bah Pynshngaiñ N Syiem na ka Congress, u Bah James Ban Basaïawmoit na ka United Democratic Party (UDP), u Bah Strong Pillar Kharjana na ka Voice of the People Party (VPP), u Bah Kordor L Nongkynrih na ka National Peoples’ Party (NPP) bad u Bah Jubanlang Kharbihkhiew na ka Hill State People’s Democratic Party (HSPDP).
Na ka liang kitei ki kyrtong haba ai jingkren ha ka rynsan, ki la pynsngew ïa la ki jong ki mat bad ka thong kaba ki don. Na ka liang ka Dorbar Shnong ruh ka la buh ïa ki mat na ka bynta ban ïatai bad ïakren ïa la ka rukom treikam bad ki mat kiba ïadei bad ka District Council lada ki poi sha ka thong jong ka jingjop ha kane ka ilekshon MDC.
Ka mat kaba kongsan kaba kine ki kyrtong ki pynsngew ha kane ka rynsan ïathir ka dei halor ka Article 371 bad ka khyrnit ba hynriew ne ka Sixth Schedule ha kaba na ka liang kitei ki kyrtong ki la sei ïa la ki jong ki nia bad ki mat ïakren.
Kine ki kyrtong ki la ïakren ruh ha kaba ïadei bad ka jingtih ïa u maroh khyndew Uranium, ka rukom pynneh-pynsah ïa ka umbam-umdih, ka rukom thungkam-thungjam kaba khuid bad suba ha KHADC bad ka jingshah thombor ki paid Khasi ha ki thaiñ khappud ha ki briew ki bym dei ki Khasi ha ki jaka kiba dang hap hapoh ka jingpeit-jingkhmih ka District Council.
