Nongstoiñ, Rymphang 09
Ka Kong Badariti Lyngdoh Nonglait ka kyrtong jong ka Hill State People’s Democratic Party (HSPDP) ka ban ïakhun ïa ka ilekshon MDC na Nongstoiñ District Council Constituency, ka la ong ba lada khyllem ki Dorbar kur kin ïeng ki Dorbar Kha hangta kan kiew ka sang ka ma ha ka jaidbynriew Khasi-Khara bad wat ym ïalehkai ïa kane. Lada u paidbah ka Nongstoiñ u ibit ïa ka, kan leit ha ïingdorbar KHADC ba kan ïakhun ban don da ka aiñ kaba tikna ïa ka shim jait shim khong na ka bynta ki kynthei.
Ïa kane, ka Kong Badariti ka la kren bad pynpaw sha ki paidbah ha ka rynsan ïalap ilekshon ha ka Sngi Saitjaiñ jong ka taïew ba la dep ba la pynlong hakhmat ïew Nongstoiñ kaba la pynïaid da ka shnong New Nongstoiñ.
Ka Kong Badariti ka la pynpaw ruh ïa ka jingsngewkhia ban ïohi ïa kawei ka dur khih (video) kaba u nongïalam ka VPP u la kynthoh da kaba ong ba ha nongkyndong ym don sang. Halor kane ka bynta ka Kong Badariti ka la pynpaw da kaba ong, “Hato ki nongkyndong ki dei ki mrad seh mo haba phi wan ban kren poh haduh katto-katto? Ma ngi lei ki nongkyndong ngi dang tip ka leit kai meikha ka pynpoi ‘pu meikha bad ka burom meikha”.
“Ngi ïohi ïa u drok uba la hiar thma ha ki shnong kyndong bad jan man ha ki thliew ïing u la wan ban hiar thma ban pynïap ïa ki khun samla, ngi la i donkam ba ïa ka Dorbar Shnong, u Sordar Shnong, u Rangbah Shnong ba kin nym kut shuh tang ha ka synshar hynrei la donkam ruh ban ai ïa ki ka bor ban bishar bad ngin nym lah ban tehlakam ïa ki jingsniew ha ki shnong ki thaw lada ngi synjor ha ka bor bishar,” ong ka Kong Badariti.
Katba na ka liang u samla Michael Thongni ban ïakhun kum kyrtong shimet ha ka ilekshon MDC na Nongstoiñ, haba kren ha katei ka rynsan ïalap ilekshon u la ong, “Lada nga jop ne nga rem ngam da don eh ka bynta ba ngan sngewsih ne sngewmong namar nga don ïa kam shakri kaba ngan shakri ïa u paidbah bad ngan ïai pyntyllun ïa ka hynrei kaei kaba donkam na ka liang ka jong nga, ka long ban pynsngew ba phin long kiba adkar haba phi jied ïa ki MDC kiba long kita ki nongda ki nongker ïa ka Khyrnit ba Hynriew namar ka Nongstoiñ ka jong ngi ka don hapdeng ka jingma bad ka jingshah pynap ha ka tyngam kaba shyrkhei bah ka ban sa khreh ban klun noh ïa ka suk ka saiñ jong ki nongshong shnong lyngba ka aiñ kaba ki pyrshang ban shna na ka Sorkar Kmie ban pynduh bor ïa ka District Council”.
U la ong ruh ba namar ka District Council ka don ïa ka bor ban ai NOC ïa u duk u suk u rit u ria ha ki shnong ki thaw ban tih maw tih shyiap hynrei ka don ka aiñ na ka Sorkar Kmie bad Sorkar Jylla ka ban khang ïa ka District Council ban aibor laitluid sha ki paidbah.
Shuh shuh, u la ong ruh sa kawei ka aiñ kaba long kum ka jingpang bampong ïa ka Khyrnit ba Hynriew bad kane ka aiñ ka dei kata kaba ong ka Municipal Act 1963. Kane ka aiñ mynta la pyntreikam ha sor Shillong bad ha ki thaiñ rilum Garo bad kane ka aiñ ka la pynduh bor ïa ka District Council ba kam lah shuh ban tuklar ïa ki kam ha kitei ki jaka bad ki Dorbar Shnong ruh kin nym lah shuh ban rai kano-kano ha kaba ïadei bad kitei ki jaka bad lada ki donkam ki hap ban leit kynjoh sha u Ward Commissioner lane u Councilor bad kane ka ap jingma ruh ïa ka Nongstoiñ.
