Shillong, Rymphang 09
U President ka National People’s Party (NPP) Meghalaya, Bah Prestone Tynsong u la ong ba kam don jingmyntoi eiei ban shu ieid jaidbynriew, lada wat ka kali kulai ruh u kulai u kyrngah khlieh ban ïaid.
U Bah Prestone u la kynthoh ïa kane ha ka jingïalap ilekshon ha Laitlyngkot, Nongkynrih ban pan jingkyrshan ïa u kyrtong ka NPP na Langkyrdem-Laitkroh Konstitwensi u Bah Rahboklang Tyn-song uba dei ruh u pyrsa trai jong u.
“Haba ieid jaidbynriew ieid shwa ïalade, ieid ïa ka ïing ka sem, sumar bha ïa ki khun ki lok, ba kin phuhmut-phuhmat. Ah! ko lok kiba ong ieit jaidbynriew ban ïaid wat ka kali kulai ruh u kulai u kyrngah khlieh, kaei ka ban jia, paidbah ïanujor bad ki konstitwensi ba marjan, ko ki paidbah wat shah ïalam bakla shuh, peit ïoh shah shoh jadu te kam long, ka la biang katto,” ong u Bah Prestone.
Haba kam ba ka Sorkar NPP ka la pynbha bun bha ïa ki surok hapoh ka Jylla, u Bah Prestone u la ong, “Kane ka pyni ïa ka jingieid ba shisha ïa ka jaidbynriew ym kum kito kiba nang tang ban shu kular katba ha la ki jong ki konstitwensi, ka jinglong-jingman ki surok kim i long shuh wat tang ban ïaid ki kali kulai. Kumta, ki paidbah kim dei ban shu ngop ha ki jingpynbiej jong kine ki seng”.
U la kular ruh ba ka NPP kan pynthikna ban ai ka jingïada kaba pura ïa ka hok longtrai ha ki liang baroh bad ki jingmyntoi jong ki paid riewlum trai muluk lyngba ki District Council.
“Kane ka ilekshon MDC ka long kaba kongsan bha. Ki don shibun ki aiñ kiba ngi kwah ban wanrah lyngba ki District Council ban nang pynkhlaiñ bad pynshngaiñ ïa ka lawei jong ki paid riewlum trai muluk,” ong u Bah Prestone.
