Tura, Rymphang 09
Ha kawei ka jingjia ba sngewsih kaba la jia ha ka Sngi Saitjaiñ, 2 ngut ki khynnah ki la khlad noh katba 3 ngut kiwei pat ki la mynsaw hadien ba ka khyndew kaba shong synjor na kawei ka jaka shna jingshna kaba don hajan ka shnong Nolbari, kaba hap hapoh Rajabala PS ha West Garo Hills (WGH) ka la hap halor jong ki katba ki dang ïalehkai hapoh.
Katkum ka khubor, katei ka jingjia ka la jia ha ka step Sngi Saitjaiñ hajan katei ka shnong ha kaba kawei ka kompeni shimet ba don bynta ban shna jingshna ka dang ïaid shakhmat bad ka jingtih khyndew da kaba pyndonkam ïa ka puh shilum (JCB).
Katkum ka jingtip ba la ïoh lum na u Gaonbura, kawei ka puh shilum (JCB) kaba don ïa u nombor AS-17-C-3618 ka la tih khyndew na ka jaka marjan jong u Nurul Amin Sarkar uba na Nolbari na ka bynta ban shna ïa ka ïing jong u.
Hadien ba la dep ïa ka kam, u nongñiah jong ka puh shilum u la pynïeng ïa ka kali bad u la leit dih sha hapoh ïing jong u trai.
Katba ha ka por kumba 11:00 baje eiei mynstep, 5 ngut ki khynnah, kata u Aladin Sarkar (10 snem ka rta), u Rofizul Mollah (7 snem ka rta), u Moksedul Sk (11snem ka rta), u Rakibul Alom (7 snem ka rta) bad u Sahil Rahman (8 snem ka rta) ki la leit shajan katei ka jaka ban ïalehkai. Kine baroh ki dei na kajuh ka shnong.
Ka khyndew kaba don halor jong ki ka la twa kynsan-kynsan bad baroh 5 ngut ki khynnah ki la shah tep shapoh.
Haba ïohsngew ïa ka jingsawa, u Sader Hoque, Komsel Hoque lem bad kiwei-kiwei ki nongshong shnong ki mareh sha katei ka jaka bad sei ïa baroh 5 ngut ki khynnah. Hynrei 2 ngut napdeng 5 ngut ki la khlad noh shuwa ban ïoh sei ïa ki. Ïa kine 2 ngut kiba la khlad noh la tip kyrteng kum u Rakibul bad u Sahil Rahman.
Katba 3 ngut kiwei pat kiba la mynsaw la pynkit noh mar-mar sha Bhaitbari CHC kaba don hajan ban ïoh ïa ka jingsumar.
