Shillong, Rymphang 09
Ka eksamin Secondary School Leaving Certi-ficate (SSLC) ïa kaba yn pynlong da ka Megha-laya Board of School Education (MBoSE) kan sdang ha ka 10 tarik mynta u bnai bad ki don haduh 64,369 ngut ki samla pule ki ban ïakhun ïa kane ka eksamin.
Kane ka eksam kan long ha ki 164 tylli ki centre ha baroh ki 12 tylli ki district jong ka Jylla bad haduh 93 tylli ki centre ki dei kiba hap hapoh ka Shillong kynthup ïa ka rilum Khasi bad Jaintia bad 71 tylli ki centre ki hap ha ki bynta jong ka Tura ba kynthup ïa ka rilum Garo baroh kawei.
Na kine ki 64,369 ngut ki samla kiba ïakhun ïa ka eksam SSLC, 26517 ngut ki dei ki samla pule shynrang bad 37852 ngut ki dei ki kynthei ha kaba kynthup ïa ki kyrdan baher bapher kata ki Regular – I: 29972, Regular – II: 16013, Private: 1455, Non Regular: 1884 , Improvement: 21 bad Compartmental: 15024.
Ki samla pule na ki 1896 tylli ki skul bad ki jaka pule kin ïakhun ïa kane ka eksam. Ha u snem bala leit, haduh 55191 ngut ki samla pule kila ïaleh ïa kane ka eksam bad ka jingdon jong kiba pass ka kot 55.80%. Kane ka eksam kan kut ha ka 21 tarik u Rymphang.
Ka eksamin kan sdang naduh ka por 10 baje mynstep bad kan kut ha ka por 1 baje janmiet. Ïa ki jingkylli yn sdang ban sam ha ka por 9:45 mynstep bad ïa ki answer script yn aiti ha ka por 9:50 mynstep. Ki sobjek vocational, theory kin long tang shi kynta naduh ka por 10 baje mynstep haduh 11 baje mynstep.
Ki bor pynïaid ka MBoSE ki la pyntip ruh namar ka jingdon jong ka ilekshon sha ki ar tylli ki Autonomous District Council (ADC) ha rilum Khasi bad Jaiñtia, ïa ki sobjek kiba ïadei bad ka eksamin SSLC ba la buh sngi ban pynlong ha ka 21 tarik, Rymphang kaba dei ka sngi thep vote la pynkynriah noh sha ka 25 tarik, Rymphang. Na ka bynta ka eksamin HSSLC, ka sobjek Physics kaba hap ha ka 24 tarik, Rymphang kaba dei ka sngi ñiew vote la pynkynriah noh sha ka 6 tarik, Lber, 2025 ryngkat bad ka sobjek History, ïa ka sobjek Sociology la pynkynriah sha ka 18 tarik, Lber, 2025 bad ïa ki sobjek Vocational/Poultry Farming-IV/Computer Technique-IV kiba hap ha ka 21 tarik, Rymphang, 2025 la pynkynriah noh sha ka 19 tarik, Lber, 2025.
Ha ka eksamin Higher Secondary School Leaving Certificate (HSSLC) 2025, ki khynnah skul ki ban ïakhun ki don 29,770 hajar ngut, kata, 23,266 hajar ngut ha ka Arts Stream ba kynthup ïa ki khynnah shynrang bad kynthei, 3959 ngut ha ka Science Stream ba kynthup ïa ki khynnah shynrang bad kynthei, 2524 ngut ha ka Commerce Stream ba kynthup ïa ki khynnah shynrang bad kynthei bad 21 ngut ha ka Vocational Stream ba kynthup ïa ki khynnah shynrang bad kynthei.
Ki jaka thoh eksamin ki don baroh 108 tylli, kata, 67 tylli ha Shillong Region bad 41 tylli ha Tura Region.
Ki skul kiba la pynïasoh bad ka MBoSE ha Shillong Region ki don 191 tylli bad 82 tylli ha Tura Region. Ki skul ki bym pat pynïasoh bad ka MBoSE ha Shillong Region ki don 113 tylli bad 63 tylli ha Tura Region bad baroh ki long 449 tylli.
