Shillong, Rymphang 09
U President ka Khasi Author Society (KAS), Dr. D.R.L Nonglait u la pynpaw ïa ka jingsngew kutlad ha kaba ïadei bad ka jingdawa ban pynrung ïa ka ktien Khasi hapoh ka khyrnit ba phra, namar ka jingbym ai jubab ka sorkar pdeng tad haduh kine ki sngi ba mynta.
Ha ka jingïakren bad u nonglum khubor, na ka liang u Dr. Nonglait u la pynpaw ba ha ka jingïakynduh bad u Rajnath Singh uba dei u Myntri ka tnad kam pohïing ba mynshwa, u la kular ban leh eiei halor kane ka mat jingdawa ka KAS. Hynrei kane baroh ka la pjah noh naduh ba wan da uwei pat u Myntri ba peit ïa ka tnad kam pohïing ka Ri kata u Amit Shah, ha kaba kim shym la ïoh jubab tad haduh mynta, hynrei ki la ïoh tang ki shithi ba ki la ïohpdiang ïa ki mat jingdawa.
“Ka Sorkar Jylla ka dei ban pynlong official language noh ïa ka ktien Khasi hapoh ka Jylla kumba long ka English, lada ngi ïoh noh ïa kane kata kan ïarap shibun ha ka ban pynkhlaiñ ïa ka jingdawa jong ka KAS ban pynrung ïa ka ktien Khasi hapoh ka khyrnit ba phra” u la ong.
U la pynpaw ba kumba long haduh mynta ka ktien Khasi ka dang long tang kum ka ‘Associate Official Language’ ha ki jaka treikam jong ka jylla bad na ka liang ka KAS kam pat da sngew hun haduh mynta. Ka KAS ka lap ruh ba ki don ki ‘officer’ ki bym da salia ïa kiba kren Khasi bad thoh Khasi.
“Ka KAS ha kine ki sngi ki ban sa wan kan sa leit ban ïakynduh ïa u Myntri Rangbah ka Jylla ban pynkynmaw halor kane ka bynta” u la pyntip.
U Dr. Nonglait u la pynshai ruh ba na ka liang ka KAS kim pyrshah ïa ka jingdawa ban pynrung lang ïa ka ktien Garo ha ka khyrnit ba phra hynrei na ka liang ka KAS ka kyrpad ba kam dei ban don kano-kano ka jingpynsuki ha ka ban pynrung noh ïa ka ktien Khasi wat ki don kiwei ruh kiba dawa ïa kajuh ka mat kumba ka KAS ka dawa.
“Ka KAS kan leh ïa la ka jong ka kam ha kaba ïadei ban kyntiew ïa ka ktien Khasi bad pynroi ïa ka bad kane ka ïaid beit shakhmat”, u la ong.
