Jowai, Rymphang 09
Shisngi hadien ba ka kyrtong jong ka Indian National Congress na Barato Mukroh Konstitwensi ka Kong Banikas Laban ka la shah khang lynti ha ki nongshong shnong Karbi ha Umkhyrmi, West Karbi Anglong District, ka Karbi Students Association (KSA) kaba don haduh saw kynhun ka la pynmih ïa ka rai ban ym ailad ïa kano-kano ka jingïalap ne jingïalang na ka bynta ka ilekshon sha JHADC hapoh u pud u sam jong ka West Karbi Anglong District, Assam.
Kum ban shu pynkynmaw, ha ka 6 tarik mynta u bnai, ki nongshong shnong ka Karbi ki la khang lynti ïa ka Kong Banikas Laban bad ka kynhun jong ka ha ka por ba ka poi ha ka shnong Umkhyrmi bad ki Karbi ki kylli balei ki leit ïalap ilekshon na ka shnong jong ki kaba hap hapoh West Karbi Anglong District, Assam. Ki la ong ruh ïa katei ka kyrtong ka Congress ba ka dei ban shim jingbit shwa na ki bor pynïaid jong ka West Karbi Anglong District shwa ba kan ïaid lynti na ka shnong jong ki.
Ha ka 7 tarik mynta u bnai, ka Karbi Students Association ka la rai ruh ba kan ym shah ïa kino-kino ki kali ban leit sha ki shnong Pnar hapoh West Karbi Anglong District na Meghalaya ne kiba mih na ki shnong Pnar hapoh West Karbi Anglong District na ka bynta ban leit ïalap ilekshon.
Ka Karbi Students Association ka la buh jingkylli kumno ba ki nongshong shnong Pnar ki shong ki sah ha West Karbi Anglong District hynrei ki leit thep vote pat sha West Jaiñtia Hills District ha ka por ba don ka ilekshon sha Meghalaya.
Katei ka rai jong ka Karbi Students Association ka la mih lehse hadien ba ki la ïohi ba u kyrtong ka NPP u Ma Aiborlang Shadap u la wan pynlong jingïalang ilekshon ha ka 6 tarik mynta u bnai ha ka shnong Mowjem hapoh Block-I.
Ïa katei ka jingïalang la wan ringdur da ki lad pathai khubor na West Karbi Anglong District bad kitei ki lad pathai khubor ki la buh jingkylli ba kumno ki briew na Meghalaya ki ïoh ban wan pynlong jingïalang ne ïalap ilekshon hapoh West Karbi Anglong District bad ki la buh jingkylli hato ka Karbi Anglong Autonomous Council (KAAC) kan leh eiei halor kane.
Kum ban shu pynkynmaw hangne hadien ka jingpynbeit thymmai jong ki Konstitwensi hapoh JHADC da ka Delimitation Committee, ka shnong Mowluber, Psiar, Khatkasla bad kiwei kiba ju hap hapoh Saphai Konstitwensi la shah pynkynriah noh sha Barato Mukroh Konstitwensi.
Te kumta ki kyrtong ïakhun ilekshon ki hap ban leit lyngba ki shnong Karbi khnang ban khamjan ka jingïaid lynti na thaiñ Mukroh sha ki thaiñ Psiar Khatkasla ne na thaiñ Psiar Khatkasla sha thaiñ Mukroh.
Lada kim leit da katei ka lynti kin hap ban ïaid lyngba ka shnong Sahsniang bad Laskein ka ban jngai haduh 30 ne 40 kilometer.
