Jowai, Rymphang 09
Katba ka jingïalap na bynta ka ilekshon sha ka ïingdorbar thawaiñ jong ka Jaiñtia Hills Autonomous District Council (JHADC) ka dang ïaid shaid-shaid ha ki 29 tylli ki konstitwensi, ka la mih syndet kawei ka jingjia ha ki thaiñ khappud jong ka West Jaiñtia Hills District bad ka West Karbi Anglong District, Assam haba ki nongshong shnong Karbi ki la pynthut ïa ka leit ka wan jong kawei ka kyrtong ïakhun ilekshon.
Katkum ki khubor ba la ïoh lum, ka kyrtong jong ka Indian National Congress (INC) na Barato Mukroh Konstitwensi ka Kong Banikas Laban bad ka kynhun jong ka, ki la shah pynsangeh lynti ha ki Karbi ha ka shnong Umkhyrmi hapoh West Karbi Anglong District, Assam ha ka Sngi Thohdieng jong ka taïew ba la dep.
Ka Kong Banikas bad ka kynhun jong ka, ki dang thmu ban leit sha ka shnong Saba kaba don hajan ka shnong Mukroh na bynta ban leit ïalap ilekshon. Hynrei ynda la poi ha ka shnong Umkhyrmi, ki paidbah Karbi ki la pynsangeh ïa ki bad kylli balei ki leit ïalap ilekshon na ka shnong jong ki kaba hap hapoh West Karbi Anglong District, Assam. Ki la ong ruh ïa ka Kong Banikas ba ka dei ban shim jingbit shwa na ki bor pynïaid jong ka West Karbi Anglong District shwa ba kan ïaid lynti na ka shnong jong ki.
Ka jingïakren hapdeng ki Karbi bad ka Kong Banikas bad ki nongbud ka la neh katto-katne por hynrei hadien katto-katne por ki Karbi ki la shah ïa ka ban bteng ïa ka jingïaid lynti jong ka sha ka shnong Saba.
Hadien ka jingpynbeit thymmai jong ki Konstitwensi hapoh JHADC da ka Delimitation Committee, ka shnong Mowluber, Psiar, Khatkasla bad kiwei de kaba ju hap hapoh Saphai Konstitwensi ki la shah pynkynriah noh sha Barato Mukroh Konstitwensi.
Te kumta ki kyrtong ïakhun ilekshon ki hap ban leit lyngba ki shnong Karbi khnang ban kham jan ka jingïaid lynti na thaiñ Mukroh sha ki thaiñ Psiar Khatkasla ne na thaiñ Psiar Khatkasla sha thaiñ Mukroh.
Lada kim leit da katei ka lynti kin hap ban ïaid lyngba ka shnong Sahsniang bad Laskeiñ ka ban jngai haduh 30 ne 40 kilometer.
