Shillong, Rymphang 09
U Bah Prestone Tynsong uba dei u Nongïalam ka National People’s Party (NPP) Meghalaya, ha ka Sngi Saitjaiñ u la kyntu ïa ki Khlieh Nongsyn-shar ba kim dei ban sheptieng ïa ka jingshah byr-ngem ba dang shen ha kawei ka seng saiñ-pyrthei namar ki dei kiba la pynkupbor da ki Auto-nomous District Council (ADC).
U Bah Prestone u la ong ïa kane ha ka jingïalap ilekshon ha Laitlyngkot, Nongkynrih ban pan jingkyrshan ïa u kyrtong ka NPP na Langkyrdem-Laitkroh, Bah Rahboklang Tynsong.
U Bah Prestone u la ong ba ki don ki seng saiñpyrthei kiba la byrngem ban tan ïa ki Rangbah Shnong sha ïingkashari tang namar ba kim shym la ai ïa ka jingbit ban pynlong ïa ki jingïalang paidbah ban ïalap ilekshon.
“Nga sngewsynei ïa baroh ki Rangbah Shnong hynrei nga ong ha phi ba ka aiñ ka don ban ïada ïa phi, sngewbha ban ym sheptieng namar phi dei kiba la ïohbor pura na ki District Council,” u la ong.
Haba kren ïa ka jingjia ha Mawlai, u Bah Prestone u la ong, “Nga pang ka dohnud haba nga peit ïa ka Mawlai Town Dorbar. Hadien ka jingïohpdiang ïa ki jingujor na ki kmie ki kpa bad ki samla pule, ki hynriew ngut ki kyrtong na Mawlai ha ryngkat bad ka MTD ki la ïarai lang ban ym shah pynlong ïa ka jingïalang paidbah naba kan pynthut ïa ki samla pule kiba dang pynkhreh ïa ki eksamin bapher-bapher. Hynrei sngewsih tang hadien shi sngi, la pynbud da ki jingbyrngem ïa ki Nongïalam Shnong ki bym shym la ïoh wat ïa ka jingsiew ban ai ka jingshakri”.
Haba thalaiñ tyngeh ïa ka jingthmu ban ujor ejahar pyrshah ïa ki Rangbah Shnong, une u Nongïalam ka NPP u la ong, “Sangeh ka jingkdew kti jong phi ïa kiwei, peit shuwa ïa la ki jong ki jingduna”.
U Bah Prestone u la ai ka jingïaroh ïa ka KHADC bad ong, “Ngi la nang aibor ïa ki Seng Kynthei bad Seng Samla hapoh ki shnong. Kane ka aiñ ka dei kaba la thaw da u CEM ba mynta Bah Pynïaid Sing Syiem ha ryngkat ka jingïasyllok bad nga lem bad ki ophisar jong ka Sorkar Jylla”.
