Jowai, Rymphang 10
Hadien ka jingpyrshah jong ki jaidbynriew Karbi ïa ki kyrtong JHADC ban leit ïalap ilekshon ha ki jaka ba ïakajia pud, na ka liang ki bor pynïaid District jong ka West Jaiñtia Hills (WJH) bad West Karbi Anglong (WKA) ki la shimkhia ban pynthikna ba ka ilekshon MDC sha ka JHADC kan long kaba ïaid beit ïaid ryntih.
Haba ïakren bad u DC ka West Jaiñtia Hills District, A.K Singh, u la pyntip ba na ka liang ki ar DC bad SP ki la ïakren na ka por sha ka por ban wanrah ïa ka shongsuk shongsaiñ.
U la pyntip ruh ba u Returning Officer ka Barato Mukroh u la hiar sha Umkhyrmi ha kaba ki paidbah ki la pyntip bym don ka jingwit jingthut hynrei la khang ban pyndonkam ïa ki tynghung pynsawa ha katei ka shnong.
U DC u la kyntu ïa ki kyrtong bad ki paidbah ban pyndonkam ïa ka surok na Sahsniang Khatkasla, Psiar sha Mowlber.
Ha ka 21 tarik Rymphang kaba dei ka sngi thep vote la rai ba baroh ki paidbah kin ïoh ban wan thep suk ïa ka vote ka jong ki sha Mukroh bad Saba.
Nalorkata, u la pyntip ruh ba la buh ïa ki Zonal Magistrate bad Sector Officer ban peitngor ïa ka jinglong jingman ha ryngkat ka jingdonlang ki pulit.
U la pyntip ruh ba ha ka 14 tarik mynta u bnai kan don biang ka jingïalang ‘Virtual Meeting’ hapdeng ki ar DC haba ïadei bad ka ilekshon MDC khnang ba kan long kaba ïaid beit ïaid ryntih.
U DC u la pyntip ruh ba mynta ka sngi ka dorbar shnong Mukroh ka la weng noh ïa ka rai sangeh ïashim bynta ha ka jingthep vote ne Boycott ïa kane ka ilekshon bad kin thep vote ha ka 21 tarik Rymphang ryngkat ka kyndon ban buh ka Sorkar ïa ka BOP na Zero point.
