Shillong, Rymphang 10
Ka Assistant Food Commissioner jong ka Food Safety ka Jylla Meghalaya, Kong B.B.S Mukhim, ka la ong ba ki nongdie-jingbam kiba ju die ha madan ki dei ban pynrung kyrteng ïalade bad kane ka tnat treikam ha ryngkat ka jingbud pyrkhing ïa ki kyndon aiñ khnang ba kino-kino ki jingbam-jingdih kiba ki die, kin ym ktah satia ïa ka met-ka phad jong ki nongbam ne nongthied ïa kitei ki jingbam.
Haba kren sha ki lad pathai khubor ha ka 10 tarik u Rymphang, 2025, ka Kong Mukhim ka la bthah ïa ki bor ba dei peit ban lum jingtip haba ïadei bad ki nongdie jingdie ha ïew, kynthup ïa ki kyrteng bad ki jingtip ba bniah shaphang ka kam jong ki, na ka bynta ban bishar bniah shuh-shuh.
Ka Kong Mukhim ka la ban jur ruh ïa ka jingdonkam ban pynthikna ïa ka jingshngaiñ jong ki paidbah bad ka jingpynïaid kaba biang ïa ki nongdie madan ha ki jaka sor.
Da kaba pynpaw ruh ba ka Sorkar ka thmu ban ïada ïa ka jingim jong ki nongdie madan katba ka dang pynneh ïa ka rukom die-jingdie ha surok ha ka rukom kaba bit-ba biang bad kaba long shngaiñ ïa ki paidbah.
Ka la ong ba kane ka jingthmu ka long kum shibynta ban pyntreikam ïa ka Meghalaya Street Vendors (Protection of Livelihood and Regulation of Street Vending) Act, 2014, kaba wad ban pynïadei ïa ka hok jong ki nongdie jingdie bad ka jingshngaiñ jong ki paidbah.
Ka la ong ruh ba kino-kino kiba die jingbam ha surok kiba khlem bud ïa ki kyndon Aiñ khamtam ha ka ban leh khuid-leh suba ïa ki jingbam, kin shah khang katkum ki kyndon Aiñ.
“Haba ka jingkhuid kam don bad ka la wanrah jingma ïa ka koit-ka khiah jong ki briew kiba bam ha kito ki dukan, ka jingpynshitom kaba kyrkieh eh kaba ngi shim, ka long ba ngi phah khang ïa ki dukan jong ki bad ngi bthah ïa ki ba kin bud pyrkhing ïa ki kyndon Aiñ”, ong ka Kong Mukhim.
Shuh-shuh, ka la ong ruh ba kumba ka long mynta, ki nongdie jingbam ha madan, ki la wan mih shakhmat ban pynrung kyrteng ïalade bad ki don tang khyndiat eh kiba khlem wan pynrung kyrteng ïalade.
Ka la ong ba ka Food Safety ka ïai pyntip bad bthah man ka por ïa ki nongdie jingbam madan ba ki dei ban bud ïa ki kyndon hynrei kito kiba khlem bud hadien ba la ïai bthah na ka por sha ka por, kin shah pynshitom katkum ki kyndon Aiñ khnang ba ki jingbam ba ki die kin long kiba shngaiñ ïa ki paidbah nongbam.
