Jied ïa nga, ngan leh kumta…” – “Em, jied ïa nga, ngan leh kumta…” Kine ki dei ki rukom ïalap ilekshon naduh mynshwa haduh mynta. Ki jingkular halor ki jingkular. Kawei halor kawei. Ynda la bun ki kyrtong, ki paidbah ruh ki thap klet mano ba kular kumno. Hynrei, ki paidbah bapli namar ki sngewtynnad ban ïashim bynta ha ki kam saiñpyrthei kaba wan tang shisien ha ka san snem, ki leit thep ‘vote’ beit. Don ruh ki bym ju leit bad ki pyndonkam ïa ka sngi thep ‘vote’ kum ka sngi shongkai, sngi leit khwai, sngi leit peit bahaïng-bahasem bad kumta ter-ter. Kim sngewdon shuh kata ka jingsngewtynnad ban thep ‘vote’ lehse namar ki la sngewthait ba la bun tang ki ‘Bah bad ki Kong Kular’ lane ba kim i don jingmyntoi na ka daw ba ki jingkylla kim ju wan lane ba ki la shu shaniah tang ha kiwei ba kin pynbunkam ban jied ïa kita ki nongthaw aiñ.
Ki kyrtong bad nongïalap ilekshon ruh kim don lynti da kumwei, hynrei ban long kita ki ‘Bah bad ki Kong Kular’. Lada kim kular ruh ym long, lada kular rum ym long. Shong ruh jhieh ïeng ruh tyngkhuh. Ki paidbah kin pynshong nongrim kumno lada kim tip kaei ba ki kyrtong bad ki seng saiñpyrthei ki kular ban leh ynda ki la poi sha ka thong. Don napdeng ki paidbah kiba shimkhia ïa ki jingkular, bad don ruh kiba kdew ba ki dei tang ki kamkai suda kiba shu pynthame. Kine kiei-kiei baroh ki long shi bynta na kata kaba ki ong ka jingsynshar paidbah kaba ma ngi ki thab ki dap ngi donbor tang shi khyllipmat ha man ka san snem. Ynda la mih na ka jaka thep ‘vote’, yn ym don shuh ki ban kynmaw ïa ngi. Kiba sah ha ka jingkynmaw jong ki nongjop kin dei tang kito kiba don ha syndah jong ki. Kiwei-kiwei kim don dor eiei shuh namar ba la kut ka tamasa. Namarkata, ban shu ïaleh shongshit than kam don jingmut na ka daw ba ngin sa kylla dukha mynsiem ynda ki kyrtong ki ban jop kin leh kumba kim ithuh shuh ynda la dep ka ilekshon.
Wat la katta ruh, ngi don ka hok bad ka kamram ban jied ïano ban phah sha Dorbar Parliament ne Assembly ne District Council. Na ka bynta ka ilekshon MDC 2025 ka ban thep ‘vote’ ha ka 21 tarik Rymphang, ki nongthep ‘vote’ ha ki 58 tylli ki konstitwensi kata 29 tylli ha Khasi Hills Autonomous District Council bad 29 tylli ha Jaiñtia Hills Autonomous District Council ki don baroh haduh 13,08,818 ngut kiba kynthup 6,32,347 ngut ki shynrang bad 6,76,467 ngut ki kynthei. Ka KHADC kaba don 29 tylli ki konstitwensi ka don 9,96,518 ngut ki nongthep ‘vote’ kiba kynthup 4,81,268 ngut ki shynrang bad 5,15,247 ngut ki kynthei. Ka JHADC ruh ka don 29 tylli ki konstitwensi tangba ka kham rit ban ïa ki konstitwensi kiba don ha KHADC. Ka JHADC ka don 3,12,300 ngut ki nongthep vote ha kaba 1,51,079 ngut ki dei shynrang bad 1,61,220 ngut ki kynthei.
Ngim tip katno ngut ki ban wan thep ‘vote’ napdeng kitei 13 lak tam kiba la ïoh ïa ka hok. Lada wan tang 90 na ka 100 ruh la ïa bun. Hynrei bunsien ha ka ilekshon MDC, ka jingpoi ki nongthep ‘vote’ ka duna haba ïanujor bad ka ilekshon MLA. Lada ki paidbah kim kheiñ snep ïa la ka jong ka kamram bad ka hok, ki ban sa shah jied ruh kin leh kumta, kin ym kheiñ snep ïa ki paidbah la ki dei kiba kyrshan ne kiba khlem kyrshan. Namarkata, ka shong ha ngi iwei-pa-iwei ban puson kaei ka bynta jong ngi ha kane ka lympung baïar kaba ki khot ka synshar paidbah. Lada ngi lah ban pynshong nongrim bha, ngin sa lah ban shim ïa ka rai kaba bha tam. Ngim dei ban duh jingkyrmen than wat la ka dei tang shisien ha ka san snem. Ngi lah ban kmen bad risa san snem hadien namarba ngi khlem pynlehnohei ïa ka kabu kaba mynta lane ngi lah ban tim ban tla ïalade namar ngi la kyntait haba ka kabu ka la don hakhmat jong ngi. Rai bha aïu kaba phi dei ban leh ha ka 21 tarik Rymphang. Shong ïing, leit khwai ne leit thep ‘vote’. Phi ‘Vote’, phi ‘Rai’.
